Сингапур КХДР — АҚШ саммитини ёритган журналистлар ташрифи ҳисобига 5,3 миллион доллар ишлаб олди, деб ёзади «ТАСС» Ngee Ann Polytechnic институти катта илмий ходими Майкл Чиамга таяниб.
Унинг сўзларига кўра, икки мамлакат етакчилари учрашувини қарийб 4 минг нафар ОАВлар вакиллари ёритган, уларнинг ҳар бири бу ерда ўртача уч кун бўлиб, бир кеча-кундузда камида 449 доллар сарф қилган. Бундан ташқари, эксперт АҚШ делегацияси харажатлари анча катта бўлганини тахмин қилмоқда.
Айни вақтда, медиа-самарадорликни баҳоловчи Meltwater компанияси бўлиб ўтган саммит Сингапурга камида 524 миллион доллар даромад келтиришини прогноз қилмоқда. Бундай ҳисоб-китоб жаҳон ОАВларида тилга олиниш сони, аудитория қамрови, маҳаллий меҳмонхоналар тарихий қадамжоларнинг иқтибос қилиниши кабиларга асосланади.
Аввалроқ мамлакат ҳукумати саммитни ўтказиш учун қарийб 15 миллион доллар сарфланганини маълум қилган эди.
Изоҳ (0)