14—15 июнь кунлари республиканинг тоғ ва тоғолди ҳудудларида сел келиши хавфи мавжуд. Бу ҳақда Фавқулодда вазиятлар вазирлиг матбуот хизматига таяниб, ЎзА хабар берди.
Фарғона, Наманган, Жиззах, Самарқанд, Навоий, Қашқадарё, Сурхондарё, Тошкент вилоятлари тоғ ва тоғолди ҳудудларида сел келиши хавфи юқори. Ушбу ҳудудларда об-ҳаво ўзгарувчан, айрим жойларда ёғингарчилик кутилади, момақалдироқ бўлиши мумкин. Шамол шарқдан ғарбий йўналишга ўзгариб 7—12 м/с (25—43 км/соат), 15 июнь куни шамол тезлиги 20 м/с (72 км/соат)гача кучайиши, жойларда 15—20 м/с (54—72 км/соат)гача кучайиши кутилади.
«Ўзбекистонда сел келиш мавсуми, асосан, март—июнь ойларига тўғри келади. Бир ойлик ёғингарчилик қисқа вақт ичида кичик ҳудудда ёғиши оқибатида тошқинлар келиб чиқади. Республикамиз ҳудудига Атлантика океани, Ўрта ер денгизи, Қора денгиз, Касбий денгиз узра келадиган ҳаво оқими, асосан кучли ёмғирли бўлади», — дейди Фавқулодда вазиятлар вазирлиги матбуот хизмати раҳбари Самандар Ҳикматуллаев.
Тоғ ва тоғолди ҳудудларида яшовчи аҳолига эҳтиёт чораларини кўриш ҳамда авария ва бошқа нохуш ҳолатлар вужудга келганда ФВВнинг +998(71) 147-10-50 «Тезкор рақам»ига мурожаат қилиш сўралади.
Изоҳ (0)