Qozog‘istonda ovoz kuchaytirgich orqali chaqiriladigan azoning shovqinini 70 detsibeldan oshirmaslik so‘raldi, deb xabar beradi “Azon.uz”.
“Azon musulmon an’analarining ayrilmas qismidir. Biroq so‘nggi paytlarda Qozog‘iston Respublikasi din ishlari va fuqarolik jamiyati vazirligiga masjidlarda azon ovozining belgilanishi bo‘yicha ko‘plab murojaatlar kelib tushdi”, – deyiladi xabarda.
Shu munosabat bilan vazirlik Qozog‘iston musulmonlar idorasi hamda Ostona va Almati shaharlari din ishlari boshqarmalari bilan hamkorlikda azon ovozining sanitariya-epidemiologiya talablariga mos bo‘lishi kerakligi haqida tushuntirish ishlarini olib bordi.
Qoidaga ko‘ra, soat 07:00 dan 23:00 gacha xonadonlarga kiradigan shovqin 55 dan 70 dBA (detsibel)gacha, soat 23:00 dan 07:00 gacha 45 dan 60 dBAgacha bo‘lishi kerak.
Vazirlik masjidlar rahbarlaridan sanitariya-epidemiologiya talablariga rioya etishni, fuqarolardan esa amaldagi qonunchilikka zid bo‘lmagan taqdirda diniy marosimlarga tushunish bilan yondashishlarini so‘radi.
Izoh (0)