Бразилия пойтахти Бразилиа шаҳрига юқоридан қаралса, қанотини ёйиб турган қуш шакли намоён бўлади. Бундай режалаштиришга шаҳарнинг бўш жойда бир бошдан қурилгани ҳисобига эришилган. TravelAsk ана шу шаҳар ҳақида ҳикоя қилди.
XVIII аср охиридан 1960 йилгача Бразилия пойтахти Рио-де-Жанейро шаҳри бўлган. Атлантика океани қирғоғида мамлакат аҳолиснинг катта қисми ва асосий иқтисодий фаолият жойлашган эди. Шу билан бир вақтда, Бразилиянинг қитъа ичидаги ҳудудлари кам ўзлаштирилганича қоларди.
Рио-де-Жанейро ва Сан-Паулу мамлакатнинг йирик шаҳарлари эди, бунда Сан-Паулу ҳам пойтахтлик учун даъвогарлик қиларди. Бу рақобатга чек қўйиш, шунингдек, мамлакатнинг ички ҳудудларини ривожлантириш учун пойтахтни қитъа ичига кўчиришга қарор қилинган.
Пойтахтни Рио-де-Жанейродан Бразилиага кўчириш ҳақидаги якуний қарор президент Жуселину ди Оливейра даврида, 1960 йилда қабул қилинган. Бу ҳақдаги гаплар эса XIX асрнинг охиридан буён давом этган эди.
Бўлажак пойтахтнинг бош меъмори этиб Лусио Коста танланган, пойтахтнинг ўзига хослиги эса унинг сунъий Параноа кўли бўйида жойлашгани бўлган. Айнан ана шу сув ҳавзасининг кесилган қирғоқ чизиғи бутун шаҳарни лойиҳалаштиришнинг бошланиш нуқтаси бўлиб хизмат қилган. Параноадаги тўғон 1959 йилда, пойтахт кўчирилиши олдидан қурилган ва пойтахт ҳудудига электр энергияси етказиб бериши керак бўлган.
Бугунги кунга келиб ГЭС мегаполиснинг ўсиб бораётган эҳтиёжларини қондира олмаяпти. Кўл шаҳарнинг шарқий томонида бўлиб, унинг қирғоқларида пойтахтнинг маъмурий, спорт ва маданий бинолари жойлашган.
Пойтахт кўчирилганидан кейин ўтган 50 йилдан ортиқ вақт ичида 140 минг аҳолиси бўлган шаҳарча 2,5 миллион аҳолига эга иқтисодий ривожланган мегаполисга айланди. Пойтахтни кўчириш бўйича режа муаллифлари Бразилиа аҳолиси 2000 йилга қадар 500 минг кишидан ошади, деб ҳисоб-китоб қилган, бироқ бу кўрсаткич 1970 йилда забт этилган. Шу боис шаҳарни режалаштириш бўйича бир қатор ўзгаришлар юзага келган.
Изоҳ (0)