Airbus компанияси бир қатор лойиҳаларни тақдим этди, улар доирасида самолётларнинг юк бўлмалари йўловчилар учун ётоқхоналарга айлантирилиши мумкин. У ерда музокара хоналари ва икки ярусли каравотлар жойлашади. TJournal лойиҳа суратларини тақдим этди.
Лойиҳа Франциянинг Zodiac Aerospace компанияси билан ҳамкорликда ишлаб чиқилган ва 2020 йилдан бошлаб A330 самолётларида қўлланилиши мумкин. Шунингдек, йирикроқ A350 учун ҳам ечимлар кўриб чиқилмоқда.
Лойиҳа доирасида яратилган икки ярусли каравотларни йиғиб, юк учун жой ажратиш мумкин. Шу орқали авиакомпания йўловчи ва юк учун жойни ўзи тақсимлаши мумкин бўлади.
Лойиҳага кўра, самолётдаги жойнинг бир қисми иш жойи ёки болалар учун ўйин майдони сифатида фойдаланилиши мумкин. Қўшимча музокаралар залида иш юзасидан учрашувлар учун кресло ва столлар ўрнатилади. Проектор йўловчиларга фильмларни катта экранда томоша қилиш ёки тақдимотлар ўтказишга имкон беради.
Бунда ҳар бир модул йўловчилар эҳтиёжи ёки авиакомпанияга боғлиқ ҳолда алоҳида фойдаланилиши мумкин.
Изоҳ (0)