Коррупцияга қарши курашиш бўйича республика идоралараро комиссияси томонидан давлат ташкилотларининг коррупцияга қарши фаолияти бўйича рейтинги аниқланди, деб ёзади ЎзА.
Мазкур рейтингда Адлия вазирлиги коррупцияга қарши курашишда юқори самарадорликка эришган давлат органлари қаторидан ўрин олди.
Адлия вазирлиги ахборот хизматининг маълум қилишича, коррупция ва бошқа ҳуқуқбузарликларнинг олдини олиш мақсадида адлия органлари ва муассасалари томонидан етти мингдан ортиқ ҳуқуқий тарғибот тадбири амалга оширилган. Соҳага доир икки ўқув қўлланма, саккиз рисола тайёрланган. 593 нусхада 133 плакат, 11 мингдан зиёд нусхада 104 буклет тайёрланган.
Тизимда коррупция ва ҳуқуқбузарликларнинг олдини олиш мақсадида бир қатор ички директив ҳужжатлар қабул қилинган. Жумладан, фуқароларга давлат хизматлари кўрсатувчи ходимларнинг ўз ишига қанчалик ҳалол ва виждонан ёндашаётганини аниқлаш мақсадида тегишли буйруқ қабул қилиниб, мунтазам равишда «сирли мижоз» тадбири ўтказиш амалиёти йўлга қўйилган.
Жорий йилнинг ўтган даврида адлия органлари томонидан 172 «сирли мижоз» тадбири ўтказилиб, натижада 64 нафар ходим интизомий жавобгарликка тортилди. Шундан тўрт нафари эгаллаб турган лавозимидан озод қилинган.
Давлат нотариал идоралари, ФҲДЁ органлари ва давлат хизматлари марказларида кўрсатилаётган хизматлар сифатига баҳо бериш учун 428 рейд ўтказилди. Натижада 225 нафар ходимга интизомий жазо чоралари қўлланилди. Шундан 198 нафар ходимга «ҳайфсан», 24 нафар ходимга жарима жазоси қўлланилган ва уч нафар ходим эгаллаб турган лавозимдан озод қилинган.
Бундан ташқари, нотариат тизимида юзага келаётган коррупцион ҳолатларнинг олдини олиш ва уларга қарши кескин курашиш мақсадида 2018 йил 1 февралдан бошлаб нотариал ҳаракатлар амалга оширилганлиги учун тўловларни электрон мобил иловалар орқали тўлаш тизими жорий этилди. Бунда тўлов квитанциялари биллинг тизими орқали автоматик равишда шакллантирилиб, чиқариб берилади.
Коррупцияга қарши ҳолатларнинг олдини олиш мақсадида барча нотариусларга ўзлари томонидан ундирилган пуллик хизматнинг 80 фоизи миқдорида қўшимча устамалар бериб келинмоқда.
Ходимлар хатти-ҳаракатларидан норозилик ҳақида келиб тушган мурожаатлар таҳлили вазирликнинг кенгайтирилган йиғилишларида муҳокама қилиниб, ходимларнинг рейтинги шакллантирилмоқда.
Изоҳ (0)