Сурхондарё вилояти Бойсун тумани ҳудудининг хавфсизлигини таъминлаш режасига асосан, 2018 йил 4—8 июнь кунлари Бойсун тумани ҳудудида махсус-тактик ўқув машғулоти ўтказилди. Бу ҳақда вилоят ИИБ матбуот хизмати хабар берди.
Сурхондарё вилояти ИИБ Ҳарбий сафарбарлик бўлими ходимлари томонидан жорий йилнинг 4—8 июнь кунлари 2018 йил учун мўлжалланган ўқув машғулотлари ўтказилди. Maxсус-тактик ўқув машғулотида Сурхондарё вилояти Ички ишлар бошқармасининг соҳавий хизматлари, Миллий гвардия, Мудофаа вазирлигининг Жануби-Ғарбий махсус ҳарбий округи Жанубий оператив йўналиши гуруҳи, ДХХ Сурхондарё вилояти бошқармаси, Давлат божхона бошқармаси, Прокуратура, Фавқулодда вазиятлар бошқармаси, Чегара қўшинлари, ҳокимият ва кенг жамоатчилик вакиллари иштирок этди.
Тадбир давомида Бойсун тумани ҳудудини ҳар қандай кўринишдаги ҳуқуқбузарликлар ва жиноятлардан олдини олиш, уюшган гуруҳлар томонидан туман ҳудудида жиноят содир этилмаслиги, қуролланган жиноятчилар томонидан гаровга олинган шахсларни озод этиш, қўлбола портловчи моддаларни аниқланганда уларни жойида махсус ходимлар томонидан йўқ қилиш, фуқароларни эвакуация қилиш бўйича амалий ва назарий машғулотлар ўтказилди.
Шу қаторда Бойсун туманининг Дарбанд, Мачай, Қизилнавр ва Кенгдала аҳоли яшаш пунктларида Сурхондарё вилояти Ички ишлар бошқармаси ва Миллий гвардия шахсий таркиби томонидан тузилган махсус гуруҳлар томонидан айланма йўллар, сўқмоқлар, дарё йўллари, ўзанларда аниқлаштириш ишлари олиб борилди.
Изоҳ (0)