Лонг Айлендда (АҚШ) онасининг банк ҳисобидан 4,5 миллион доллар ўғирлаб, бу пулларга шахсий самолёт, SuperBowl’га чипта ва 100 минг долларлик шампан виносини сотиб олган 24 ёшли Сэмюэл Бернстайн ҳибсга олинди. Бу ҳақда NBC нашрига таяниб, Forum Daily хабар берди.
Сэмюэлнинг онаси пуллар ўғирланган банк ҳисоб рақамидан хайрия мақсадларида ва ногиронларнинг теннис клубини молиялаштириш йўлида фойдаланиб келган. Сэмюэл эса 2015 йилнинг июнидан 2017 йилнинг июнига қадар у ердан пулларни ўғирлаб турган. У мазкур ҳисоб рақами орқали ўзининг ва бир нечта дўстининг кредит картасидаги қарзлардан қутулиш йўлида фойдаланган. Бундан ташқари Super Bowl’га чипта, хусусий самолёт, 100 минг долларга бир бутилка шампан виносини харид қилган.
Бернстайн пулларни Venmo, Paypal, Squareup ва Plastiq каби мобил сервислар ёрдамида ўтказган ва шундан сўнг бошқа транзакциялар орқали уларни нақдлаштирган.
Сэмюэлнинг онаси ўғирлик ҳақида 2017 йилнинг апрелида хабар топган. Унга қадар эса ҳисобдан миллионлаб пул ўғирлаб бўлинган эди. Она бу борада прокуратурага шикоят қилган. Шундан сўнг Сэмюэл ўғирликда айбланиб ҳибсга олинган.
Бернстайн ҳуқуқ-тартибот органларига таҳдид қилган, ўз онасининг уйини вайрон этишга ваъда берган. Агарда Сэмюэлнинг айби исботланадиган бўлса, у 25 йилгача озодликдан маҳрум этилиши мумкин.
Изоҳ (0)