Long Aylendda (AQSh) onasining bank hisobidan 4,5 million dollar o‘g‘irlab, bu pullarga shaxsiy samolyot, Super Bowl’ga chipta va 100 ming dollarlik shampan vinosini sotib olgan 24 yoshli Semyuel Bernstayn hibsga olindi. Bu haqda NBC nashriga tayanib, Forum Daily xabar berdi.
Semyuelning onasi pullar o‘g‘irlangan bank hisob raqamidan xayriya maqsadlarida va nogironlarning tennis klubini moliyalashtirish yo‘lida foydalanib kelgan. Semyuel esa 2015-yilning iyunidan 2017-yilning iyuniga qadar u yerdan pullarni o‘g‘irlab turgan. U mazkur hisob raqami orqali o‘zining va bir nechta do‘stining kredit kartasidagi qarzlardan qutulish yo‘lida foydalangan. Bundan tashqari Super Bowl’ga chipta, xususiy samolyot, 100 ming dollarga bir butilka shampan vinosini xarid qilgan.
Bernstayn pullarni Venmo, Paypal, Squareup va Plastiq kabi mobil servislar yordamida o‘tkazgan va shundan so‘ng boshqa tranzaksiyalar orqali ularni naqdlashtirgan.
Semyuelning onasi o‘g‘irlik haqida 2017-yilning aprelida xabar topgan. Unga qadar esa hisobdan millionlab pul o‘g‘irlab bo‘lingan edi. Ona bu borada prokuraturaga shikoyat qilgan. Shundan so‘ng Semyuel o‘g‘irlikda ayblanib hibsga olingan.
Bernstayn huquq-tartibot organlariga tahdid qilgan, o‘z onasining uyini vayron etishga va’da bergan. Agarda Semyuelning aybi isbotlanadigan bo‘lsa, u 25 yilgacha ozodlikdan mahrum etilishi mumkin.
Izoh (0)