Ижтимоий-маънавий муҳитни ўрганиш бўйича Республика ишчи гуруҳи Андижон вилояти Балиқчи тумани «Сиза» маҳалла фуқаролар йиғини Баланд кўчаси 24-уйда истиқомат қилувчи Жакбарали Маматов хонадонида бўлди, деб ёзади ЎзА. Оиланинг икки нафар қиз фарзанди – 1993 йили туғилган Шоҳсанам ва 1997 йили туғилган Жумагул Мўйиддиновалар 1-гуруҳ ногирони бўлиб туғилган. 11 ёшли кенжатой Жаҳонгир Мўйиддинов эса соғлом ва ота-онасининг қанотига кирмоқда.
Андижон вилоят касаба уюшмалари ташкилотлари бирлашмаси томонидан замонавий Janome тикув машинаси ушбу хонадонга тақдим этилди. Шу билан бирга ногиронлик аравачаси ҳам етказиб берилди. Оила аъзоларининг қувончи чексиз эди.
Ўрганишлар чоғида «Сиза» ва «Оқтепа» маҳалла фуқаролар йиғинларидаги оғир шароитда кун кечираётган, оиласига бир сўм ҳам даромад кирмаётган, бола-чақасини боқишга қийналаётган хонадонлар ҳам аниқланди. Боқувчисини йўқотган, якка-ёлғиз, ногиронлиги бор, кам таъминланган оилаларга 20 қоп ун, 32 килограмм ёғ ва бошқа зарур озиқ-овқат маҳсулотлари етказиб берилди.
«Оқтепа» маҳалласи «Водий гавҳари» кўчаси 44-уйда яшовчи Камолов Сардор кўз касаллигидан 5 ёшлигидан буён азият чекиб келади. Ёшлигида ўйинқароқлик қилиб, бир кўзи бутунлай кўрмай қолди. Ўнг кўзининг кўриш қобилияти эса пасайиб борди ва ҳозирда минус етти (-7)га тушиб қолди. Оқибатда кап-катта норғул йигит меҳнатга яроқсиз бўлиб қолди.
Ишчи гуруҳи тавсиясига кўра, Сардор Камоловга Андижон вилоят ҳокимлиги соғлиқни сақлаш бошқармаси томонидан Стационар шароитда имтиёзли (бепул) даволаниш учун йўлланма расмийлаштириб берилди. Уйда вақтинчалик ишсиз ўтирган турмуш ўртоғи эса ҳақ тўланадиган жамоат ишига таклиф қилинди.
Изоҳ (0)