Губкин номидаги Россия давлат нефть ва газ университети Тошкент филиалининг 23 нафар талабаси ўқишдан четлатилди. Бу ҳақда Sputnik хабар бермоқда.
Олий ўқув юрти декани Шавкат Равиловга кўра, университетдан жорий йилда 22 киши академик қарздорлик, яна бири эса ички тартиб-қоидаларга бўйсунмаганлиги сабабли талабалар сафидан чиқарилган.
«Ўқишдан четлатилган талабалар бугунги кунда Олий таълим вазирлигига, порталга мурожаат қилмоқда. Аммо улар ўз мурожаатига тўғри четлаштирилганликлари ҳақида жавоб олган», — деб қўшимча қилди Равилов.
Деканнинг таъкидлашича, талабалар ўз ҳуқуқларини ҳимоя қилишни истаб уч марта адвокат ҳам ёллаган. Аммо ўқув юрти раҳбарияти томонидан тақдим этилган ҳужжат (буйруқ ва асос)ларни ўрганиб чиққан адвокатлар ўқишдан четлаштириш қарори тўғри қабул қилинган, деган хулосага келиб, талабаларни ҳимоя қилишдан бош тортган.
Равилов, шунингдек, ушбу талабаларга икки марта имконият тақдим этилгани, аммо улар бундан ҳам фойдаланмаганини билдирди.
Изоҳ (0)