Имом Бухорий халқаро илмий-тадқиқот марказида Туркиядан келган исломшунос олимлар иштирокида тадбир бўлиб ўтди. Бу ҳақда Самарқанд вилоят ҳокимлигининг Facebook’даги саҳифасида маълум қилинди.
Туркиянинг нуфузли олий ўқув юртларидан келган 30 дан ортиқ профессор-ўқитувчи ўз давлатларида ислом динининг ўқитилиши ва фойдаланиладиган адабиётлар, манбалар ҳақида маълумот берди.
Тадбир давомида Имом Бухорий илмий тадқиқот маркази ва Туркиянинг Истанбул университети илоҳиёт факультети, Ибн Халдун, Кастомоно ва Истанбул заин университетлари ўртасида илмий ҳамкорлик ва мутахассислар алмашинуви бўйича меморандум имзоланди.
Ушбу меморандум асосида келажакда ўзаро кадрлар алмашиш ва Туркия фондларида сақланаётган ноёб қўлёзма асарларини ўрганиш, уларни ўзбек тилига таржима қилиш ва халққа етказиш асосий мақсад қилинган.
Бундан ташқари, буюк алломаларнинг илмий меросини ўрганаётган тадқиқотчиларга туркиялик профессор-ўқитувчилар, уларнинг илмий ишларига эса ўзбек олимлари раҳбарлик қилиши ҳам режалаштирилган.
Халқаро тадқиқот маркази томонидан Имом Бухорий халқаро стипендиясини таъсис этиб, буюк муҳаддис илмий меросини ўрганаётган бошқа давлатлардаги тадқиқотчиларни рағбатлантириб бориш ҳам кўзда тутилмоқда.
Изоҳ (0)