Бош прокуратура Сергели туманида фирибгарликдан жабрланган оилаларни уй-жой билан таъминлаш чораларини кўрди

Бош прокуратурада Сергели туманида жойлашган ётоқхоналардан бирида яшовчи фуқаролар қабул қилинди. Бу ҳақда маҳкама матбуот хизмати маълум қилди.

Аниқланишича, фуқаро А.Т. Нова Universal МЧЖ раҳбари бўла туриб, Ўзбекистон Республикаси ИИВ балансида бўлган 9 қаватли ётоқхона биносини замонавий меҳмонхона мажмуаси қуриш учун 300 миллион сўм инвестиция киритиш шарти билан тендер танловида «нол» қийматда сотиб олган.

Нова Universal МЧЖ ва Давлат мулк қўмитаси Тошкент шаҳар бошқармаси ўртасида 2005 йил 15 сентябрда ётоқхона биносининг олди-сотди шартномаси тузилган. А.Т. инвестиция мажбуриятларини бажарганлиги ҳақида ҳужжатларни сохталаштириб, 2007 йил 8 январда бинога эгалик ҳуқуқини берувчи 2-сонли давлат ордерини олган.

Шундан сўнг, А.Т. ушбу ётоқхонанинг уй-жой фондига киритилмаган 27 та хонадонини фуқароларга ҳужжатларини кейинчалик тегишли тартибда расмийлаштиришга ваъда бериб, 103,4 миллион сўмга сотиб юборган.

Жиноят ишлари бўйича Сергели туман судининг 2011 йил 4 апрелдаги ҳукмига кўра, А.Т. Жиноят кодексининг 168-моддаси 3-қисми «а, в» бандлари ва бошқа моддаларида назарда тутилган жиноятларни содир этганликда айбли деб топилиб, унга 9 йил муддатга озодликдан маҳрум қилиш жазоси тайинланган.

Шунингдек, суд ҳукми билан судланувчидан жабрланувчилар фойдасига 103,4 миллион сўм зарар суммаси ундирилган. Бироқ, жабрланувчилар олинган хонадонларга нисбатан мулк ҳуқуқини қонунийлаштиришни талаб қилиб, ушбу пул маблағини олишни рад этган.

Бош прокуратура аралашувидан сўнг қайд этилган оилаларни уй-жой билан таъминлашга қаратилган қатор чора-тадбирлар амалга оширилди.