Инновацион ривожланиш вазирлигида Канаданинг Россиядаги элчихонаси тижорат ва иқтисод масалалари бўйича маслаҳатчиси Анник Гуле билан учрашув бўлиб ўтди. Бу ҳақда «Дарё»га вазирлик матбуот хизмати маълум қилди.
Гуле хоним Канада Ўзбекистон билан энергетика, тоғ-кончилик, авиация, соғлиқни сақлаш ва ахборот технологиялари соҳасида ҳамкорлик қилишга тайёр эканини баён қилди. Бугунги кунда Канаданинг SkyPower компанияси Самарқанд вилоятида қуёш электр станцияси қуриш учун 1,3 миллиард доллар инвестиция киритаётгани, июнь ойининг охирларида тоғ-кон соҳасида фаолият юритадиган бир қатор компанияларнинг Тошкентга ташрифи кутилаётгани ҳақида хабар берди.
А. Гуле Канадада марказдан узоқ бўлган ҳудудларида йўлга қўйилган ҳамширалик тизимини Ўзбекистонга татбиқ қилиш мумкинлиги, ушбу мамлакатнинг кўплаб провинцияларида касалликларни мустақил диагностика қилиш ва даволаш ҳуқуқига эга ҳамшираларнинг ишлаши аҳолининг тиббий қамрови кенгайишига сабаб бўлишини айтиб ўтди.
Инновацион ривожланиш вазири Иброҳим Абдураҳмонов республикада энергияга бўлган эҳтиёж баландлиги, бу соҳада қатор муаммолар мавжудлигини таъкидлаб, муқобил энергия манбаларини жорий қилиш зарурияти ҳақида тўхталди. Шунингдек, Ўзбекистон аграр соҳасини ривожлантириш учун тупроқ сифатини ошириш йўлида тизимли ишлар олиб борилиши зарурлиги муҳокама қилинди.
Томонлар Ўзбекистон ва Канада ўртасида иқтисодий, илмий-тадқиқот ишларини ривожлантириш бўйича ҳамкорликни йўлга қўйишга келишиб, турли соҳаларга инновацион технологиялар ва ғояларни жорий этиш йўлида биргаликда фаолият юритиш бўйича лойиҳалар устида ишлашга тайёр эканликларини билдирди.
Изоҳ (0)