Innovatsion rivojlanish vazirligida Kanadaning Rossiyadagi elchixonasi tijorat va iqtisod masalalari bo‘yicha maslahatchisi Annik Gule bilan uchrashuv bo‘lib o‘tdi. Bu haqda “Daryo”ga vazirlik matbuot xizmati ma’lum qildi.
Gule xonim Kanada O‘zbekiston bilan energetika, tog‘-konchilik, aviatsiya, sog‘liqni saqlash va axborot texnologiyalari sohasida hamkorlik qilishga tayyor ekanini bayon qildi. Bugungi kunda Kanadaning SkyPower kompaniyasi Samarqand viloyatida quyosh elektr stansiyasi qurish uchun 1,3 milliard dollar investitsiya kiritayotgani, iyun oyining oxirlarida tog‘-kon sohasida faoliyat yuritadigan bir qator kompaniyalarning Toshkentga tashrifi kutilayotgani haqida xabar berdi.
A. Gule Kanadada markazdan uzoq bo‘lgan hududlarida yo‘lga qo‘yilgan hamshiralik tizimini O‘zbekistonga tatbiq qilish mumkinligi, ushbu mamlakatning ko‘plab provinsiyalarida kasalliklarni mustaqil diagnostika qilish va davolash huquqiga ega hamshiralarning ishlashi aholining tibbiy qamrovi kengayishiga sabab bo‘lishini aytib o‘tdi.
Innovatsion rivojlanish vaziri Ibrohim Abdurahmonov respublikada energiyaga bo‘lgan ehtiyoj balandligi, bu sohada qator muammolar mavjudligini ta’kidlab, muqobil energiya manbalarini joriy qilish zaruriyati haqida to‘xtaldi. Shuningdek, O‘zbekiston agrar sohasini rivojlantirish uchun tuproq sifatini oshirish yo‘lida tizimli ishlar olib borilishi zarurligi muhokama qilindi.
Tomonlar O‘zbekiston va Kanada o‘rtasida iqtisodiy, ilmiy-tadqiqot ishlarini rivojlantirish bo‘yicha hamkorlikni yo‘lga qo‘yishga kelishib, turli sohalarga innovatsion texnologiyalar va g‘oyalarni joriy etish yo‘lida birgalikda faoliyat yuritish bo‘yicha loyihalar ustida ishlashga tayyor ekanliklarini bildirdi.
Izoh (0)