Молия вазири Жамшид Қўчқоров Жанубий Кореянинг Evergreen Motors Group компанияси раиси Ким Чанг Кеонни қабул қилди. Бу ҳақда вазирлик матбуот хизматига таяниб, Spot хабар берди.
Маълум бўлишича, Сеул ва Тошкентда бизнес-марказларни очиш режалаштирилмоқда.
«Мазкур бизнес-марказлар икки мамлакат ишбилармонларига Ўзбекистондаги кичик ва ўрта бизнес корхоналарига янги технология ва Корея инвестициясини жалб қилиш билан шуғулланадиган қўшма тижорат компанияларини яратишга хизмат қилади», — дейилади хабарда.
Evergreen Motors Group раиси ҳам ўз навбатида Ўзбекистонда 10 та мактабгача таълим муассасаларини қуриш борасидаги режалари билан бўлишди. Бунинг учун компания тўғридан-тўғри 12 миллион доллар инвестиция киритади.
«15 та турли факультетга эга Сежонг университетининг филиалини яратиш истиқболлари муҳокама қилинди. Асосий эътибор тиббиёт йўналишига қаратилади», — дея таъкидланади идорада.
Бундан ташқари яқин вақтлар ичида Пучон университетининг маъктабгача таълим ва қурилиш йўналишидаги иккита факультетини очиш ҳам режалаштирилган.
Изоҳ (0)