Фарғона вилояти Олтиариқ туманида жорий йилнинг февраль ойида 5 ёшли қизни йўқолиши ва кейинчалик унинг вафот этган ҳолда топилиши ижтимоий тармоқларда тарқалиб, анча шов-шувга ва турли хил гап-сўзларга сабаб бўлган эди. ЎзА ушбу воқеа оид жиноят иши судда кўриб чиқилаётгани ҳақида хабар берди.
Мазкур ҳолат бўйича Фарғона вилояти ИИБ ҳузуридаги тергов бошқармаси томонидан дастлабки тергов ҳаракатлари олиб борилган.
Дастлабки тергов натижасига кўра, Қўштепа туманида яшовчи 1998 йилда туғилган Акмал Абдураҳмонов (дастлабки хабарларда гумонланувчи Акмал Абдураҳимов деб келтирилган) Олтиариқ тумани Полосон маҳалла фуқаролар йиғинида яшовчи 5 ёшли Кибриё Ғоффоралиевани 2018 йил 5 февраль куни ўзи қатнайдиган 6-мактабгача таълим муассасасидан чиқиб кетаётганида ўғирлаган. У ўзининг велосипедида Олтиариқ тумани Тинчлик маҳалласи ҳудудидан ўтган «Тошкент—Марғилон—Андижон» йўналишидаги темир йўлнинг 244 километр 6-пикетида атроф қоронғу бўлишига қарамай, қизчани қаровсиз ҳолда ташлаб кетган.
Қаровсиз қолган Кибриё Ғоффоралиева темир йўлдан ўтиб бораётган 62-поезднинг бўртиб чиққан қисмларига урилиб, ҳаёти учун хавфли бўлган кўплаб тан жароҳатлари олиши оқибатида воқеа жойида вафот этган. Ички ишлар идоралари томонидан олиб борилган тезкор қидирув давомида мазкур жиноятни содир этган Акмал Абдураҳмонов қўлга олинган.
Жиноят ишлари бўйича Тошлоқ туман суди айни пайтда Акмал Абдураҳмоновга нисбатан жиноят ишини кўриб чиқмоқда.
«Мазкур жиноят ишида судланувчи Акмал Абдураҳмонов оғир оқибатларга сабаб бўлган одам ўғирлаш ҳамда одамнинг ўлимига олиб келган ҳаёти ёки соғлиғи хавф остида қолган ва ўзини-ўзи ҳимоя қилиш имкониятидан маҳрум бўлган шахсни хавфли аҳволга солиб қўйиш каби жиноятларни содир этганликда айбланмоқда. Судланувчи тегишлича Жиноят кодексининг 137-моддаси (одам ўғирлаш) ва 117-моддаси (хавф остида қолдириш) жиноятларини содир этганликда айбланган», — дейди жиноят ишлари бўйича Тошлоқ туман суди раиси Азамат Ҳабибуллаев.
Судланувчи Акмал Абдураҳмоновга нисбатан «қамоқ» эҳтиёт чораси қўлланилган.
Изоҳ (0)