Farg‘ona viloyati Oltiariq tumanida joriy yilning fevral oyida 5 yoshli qizni yo‘qolishi va keyinchalik uning vafot etgan holda topilishi ijtimoiy tarmoqlarda tarqalib, ancha shov-shuvga va turli xil gap-so‘zlarga sabab bo‘lgan edi. O‘zA ushbu voqea oid jinoyat ishi sudda ko‘rib chiqilayotgani haqida xabar berdi.
Mazkur holat bo‘yicha Farg‘ona viloyati IIB huzuridagi tergov boshqarmasi tomonidan dastlabki tergov harakatlari olib borilgan.
Dastlabki tergov natijasiga ko‘ra, Qo‘shtepa tumanida yashovchi 1998-yilda tug‘ilgan Akmal Abdurahmonov (dastlabki xabarlarda gumonlanuvchi Akmal Abdurahimov deb keltirilgan) Oltiariq tumani Poloson mahalla fuqarolar yig‘inida yashovchi 5 yoshli Kibriyo G‘offoraliyevani 2018-yil 5-fevral kuni o‘zi qatnaydigan 6-maktabgacha ta’lim muassasasidan chiqib ketayotganida o‘g‘irlagan. U o‘zining velosipedida Oltiariq tumani Tinchlik mahallasi hududidan o‘tgan “Toshkent—Marg‘ilon—Andijon” yo‘nalishidagi temir yo‘lning 244 kilometr 6-piketida atrof qorong‘u bo‘lishiga qaramay, qizchani qarovsiz holda tashlab ketgan.
Qarovsiz qolgan Kibriyo G‘offoraliyeva temir yo‘ldan o‘tib borayotgan 62-poyezdning bo‘rtib chiqqan qismlariga urilib, hayoti uchun xavfli bo‘lgan ko‘plab tan jarohatlari olishi oqibatida voqea joyida vafot etgan. Ichki ishlar idoralari tomonidan olib borilgan tezkor qidiruv davomida mazkur jinoyatni sodir etgan Akmal Abdurahmonov qo‘lga olingan.
Jinoyat ishlari bo‘yicha Toshloq tuman sudi ayni paytda Akmal Abdurahmonovga nisbatan jinoyat ishini ko‘rib chiqmoqda.
“Mazkur jinoyat ishida sudlanuvchi Akmal Abdurahmonov og‘ir oqibatlarga sabab bo‘lgan odam o‘g‘irlash hamda odamning o‘limiga olib kelgan hayoti yoki sog‘lig‘i xavf ostida qolgan va o‘zini-o‘zi himoya qilish imkoniyatidan mahrum bo‘lgan shaxsni xavfli ahvolga solib qo‘yish kabi jinoyatlarni sodir etganlikda ayblanmoqda. Sudlanuvchi tegishlicha Jinoyat kodeksining 137-moddasi (odam o‘g‘irlash) va 117-moddasi (xavf ostida qoldirish) jinoyatlarini sodir etganlikda ayblangan”, — deydi jinoyat ishlari bo‘yicha Toshloq tuman sudi raisi Azamat Habibullayev.
Sudlanuvchi Akmal Abdurahmonovga nisbatan “qamoq” ehtiyot chorasi qo‘llanilgan.
Izoh (0)