Тошкент шаҳар Ички ишлар бош бошқармасида ташкил этилган йиғилишда бошқарма ҳузуридаги Тергов бўлими, Ўзбекистон Республикаси Бош прокуратураси, Мажбурий ижро бюросининг ахборот-коммуникация технологияларини жорий этиш маркази ва «Unicon.uz» ДУК масъул ходимлари томонидан Ўзбекистон Республикаси Президентининг 2018 йил 14 майдаги «Жиноят ва жиноят процессуал қонунчилиги тизимини тубдан такомиллаштириш чора-тадбирлари тўғрисида»ги қарорида белгиланган вазифалар, жумладан амалга оширилаётган жиноят ишларини юритиш тартибини босқичма-босқич рақамлаштириш бўйича таклиф этилаётган «Электрон жиноят иши» лойиҳаси муҳокама қилинди. Бу ҳақда ИИББ матбуот хизмати хабар бермоқда.
Қарорга мувофиқ, «Электрон жиноят иши» лойиҳаси тажриба тариқасида дастлаб Тошкент шаҳрининг Яккасарой ва Миробод туманларида шу йилнинг 1 декабрига қадар жорий этилиши кўзда тутилган. Шу муносабат билан йиғилиш қатнашчилари томонидан мазкур вазифалар ижроси назоратини амалга ошириш учун ишчи гуруҳи тузилди.
Йиғилишда лойиҳанинг афзалликлари ва хусусан процессуал ҳаракатларни амалга ошириш тартибларини, жумладан, электрон шаклда санкциялар олиш, далилларни тўплаш, экспертизалар, суд муҳокамаси ўтказиш ва суд қарорларини ижро этиш орқали соддалаштириш ҳақида батафсил тушунчалар берилди.
«Электрон жиноят иши» лойиҳаси жиноят ишларини юритиш жараёнларини, шу жумладан, жиноят ишлари бўйича иш юритувида тартиб-таомилларни қисқартириш ва босқичларни чиқариб ташлаш орқали уни оптималлаштиришга ёрдам бериши таъкидланди.
Эслатиб ўтамиз, 2019 йил 1 октябрга қадар дастлабки лойиҳанинг синовлари ва натижаларидан келиб чиқиб жиноят ишлари бўйича электрон иш юритуви жорий қилиниши муносабат билан жиноят ва жиноят процессуал қонунчилигини такомиллаштириш бўйича таклифлар киритиш белгиланган.
Изоҳ (0)