Самарқандда Хитойнинг Шэньси провинцияси вакиллари билан учрашув ўтказилди

Самарқанд вилояти ҳокимлигида Хитой Халқ Республикасининг Шэньси провинцияси вакиллари ҳамда тадбиркорлар билан учрашув ўтказилди, дея хабар бермоқда ЎзА.

Самарқанд вилояти ҳокими Т.Жўраев меҳмонларни Ўзбекистонга ташрифи билан қутлаб, Ўзбекистон Республикаси Президенти ва Хитой Халқ Республикаси Раиси томонидан мамлакатлар ўртасида савдо-иқтисодий, маданий-гуманитар ва бошқа соҳаларда ҳамкорлик алоқаларини янада мустаҳкамлашга алоҳида эътибор қаратилаётганини таъкидлади. Айниқса, икки давлат минтақалари ўртасида йўлга қўйилаётган алоқалар ҳар томонлама манфаатли ва истиқболли бўлаётгани қайд этилди.

2013 йилда Самарқанд вилояти ва Шэньси провинцияси ўртасида биродарлик алоқалари йўлга қўйилган. Ўзбекистон Савдо-саноат палатаси Самарқанд вилояти ҳудудий бошқармаси ҳамда Шэньси провинцияси Хитой халқаро савдо тараққиётига кўмаклашувчи қўмитаси ўртасида имзоланган ҳамкорлик меморандуми асосида ҳар йили биргаликда бизнес-форумлар ташкил этилади.

Шэньси қишлоқ хўжалиги иқтисодиёти жамияти директори Фанг Ши Жинг хитойлик тадбиркорларнинг Самарқандга ташрифи шу пайтгача эришилган келишувларни амалга ошириш жараёнларини жадаллаштириш ва келгусидаги ҳамкорлик йўналишларини кенгайтиришда муҳим омил бўлишини қайд этди.

Учрашувдан сўнг Савдо-саноат палатаси Самарқанд вилояти ҳудудий бошқармасида маҳаллий ишлаб чиқарувчилар ва хитойлик тадбиркорларнинг мулоқоти ўтказилди. Тадбир давомида ўзаро ҳамкорлик истиқболлари муҳокама этилиб, ишлаб чиқариш ва товар айирбошлаш борасида келишувларга эришилди. Шэньси провинцияси ва Самарқанд вилояти ўртасида ҳамкорлик меморандуми имзоланди.

– Биз қишлоқ хўжалиги маҳсулотларини Ўзбекистондан импорт қилиш баробарида, соҳа субъектларига маҳсулотни қайта ишловчи замонавий ускуналар етказиб беришни ҳам режалаштирганмиз, – дейди тадбиркор Финг Вэй. – Бугунги учрашувларимизда бу борада ўзаро фикрлашиб олдик. Маҳаллий тадбиркорларнинг ишлаб чиқаришни модернизация қилиш ва қайта ишлашни ташкил этишга қизиқиши бизга манзур бўлди.

Меҳмонлар Самарқанд давлат университети ҳудудида Конфуций ҳайкали ўрнатилиши режалаштирилган хиёбон лойиҳасини кўздан кечирди.

Шэньси провинцияси вакилларининг Самарқандга ташрифи давомида вилоятдаги бир қатор корхоналар фаолияти билан танишув ҳамда шаҳардаги тарихий-маданий обидалар зиёрати режалаштирилган.