Наманган вилояти давлат солиқ бошқармаси раҳбари Абдували Тешабоев тасарруфидаги, яъни 4-сектор ҳудуди саналган Уйчи туманида айни пайтда 56 та маҳалла фуқаролар йиғини мавжуд. Улардаги 36059 та хонадонда 53113 оила истиқомат қилмоқда, дея хабар беради ЎзА саҳифаларида журналист Оқилхон Дадабоев.
«Бирлашган» маҳалла фуқаролар йиғинидаги маданият ва аҳоли дам олиш масканида сектор раҳбари билан бўлиб ўтган навбатдаги сайёр қабул ҳам бевосита ҳудудларни комплекс ривожлантириш, аҳолини ижтимоий ҳимоя қилиш ва турмуш даражасини янада ошириш, тадбиркорликни қўллаб-қувватлаш, ҳуқуқбузарликни олдини олиш ва бу борада олиб борилаётган ишларнинг самарадорлигини оширишга қаратилди. Мулоқотда фуқаролар томонидан тадбиркорликка оид, имтиёзли кредит олиш, бандликни таъминлаш ҳамда тиббиёт билан боғлиқ масалалар ўртага ташланди.
Бинобарин, уйма-уй юриб, халқ билан яқиндан мулоқот қилиниши натижасида шу йилнинг ўтган даври мобайнида фуқароларни қийнаётган муаммоларнинг 70 фоизи тўртта сектор бошлиқлари ва тумандаги мутасадди корхона-ташкилотлар раҳбарлари билан ҳамкорликда ижобий бартараф қилинди.
Таъкидлаш жоиз, секторларда кам таъминланган оилалар, ёлғиз кексалар, ногиронларни ижтимоий қўллаб-қувватлаш, уларга моддий ва маънавий ёрдам кўрсатишга алоҳида эътибор қаратилган. Муборак Рамазон ойида қилинган ҳар қандай эзгу амалнинг савоби эса бошқа ойларникидан-да улуғроқ.
Бу галги сайёр қабул давомида 4-сектор раҳбари ва мутасаддилар аҳоли хонадонларида бўлиб, якка-ёлғиз, кам таъминланган фуқароларнинг турмуш тарзи билан яқиндан танишди. Тумандаги «Кесканёр» маҳалла фуқаролар йиғини Соҳил бўйи кўчасида яшовчи ака-ука Маҳмуджон, Эрали ва Шерали Қамбаровларнинг биринчи гуруҳ ногиронлиги бор. Шу ҳудудда яшовчи 80 ёшни қаршилаган Ёқубжон Иброҳимов ҳам узоқ йиллардан бери ногиронлик аравачасига муҳтож эди. Мулоқотлар давомида уларнинг ҳар бирига Рамазон туҳфаси сифатида ногиронлик аравачаси топширилди.
Изоҳ (0)