Парижда муҳожир йигит кўп қаватли уй балконида осилиб қолган болани қутқарди (видео)

Парижда кўп қаватли уйнинг балконида 4 ёшли бола осилиб қолгани ва исталган вақт йиқилиб тушиши мумкинлигини кўрган 22 ёшли Мамуд Гассам саноқли сонияларда уйнинг олд тарафидан тирмашиб чиқиб, болани ушлаб қолмоқчи бўлаётган эркак қўлидан олган. Бу ҳақда TJournal ёзмоқда.

Қутқарув хизмати ходимлари етиб келганида Гассам болани қутқариб бўлган эди. Воқеани видеога олган одамлар уни ижтимоий тармоққа жойлаштирган. ОАВ ва Twitter’да девордан юқорига усталик билан тирмашиб чиққан йигитни «ҳақиқий ўргимчак одам» деб аташган. Йигит — Мали давлатидан ноқонуний равишда кўчиб келган муҳожир.

BFM TV каналига берган интервьюсида Гассам ўртоқлари билан футбол кўриш учун ресторанга бормоқчи бўлиб уйнинг ёнидан ўтганини айтган. «Мен болаларни яхши кўраман, шунинг учун болакай жабр кўришини истамадим. Югуриб бордим ва уни қутқариш йўлини ўйлай бошладим. Худога шукр, балконга тирмашиб чиқишни уддаладим», — деди  Мамуд Гассам.

Франция президенти Эммануэль Макрон францияликлар номидан миннатдорчилик билдириш учун  Мамуд Гассамни Елисей саройига таклиф қилди. Париж мери Анн Идалго эса Гассамга қўнғироқ қилиб, шахсан ташаккур айтди. «У Малидан бир неча ой илгари кўчиб келган. Париж унинг бу ерда яшаш учун қолишини қўллаб-қувватлайди», — деди мер.