«Роскомнадзор» раҳбари: Сўнгги терактларнинг бари Telegram орқали мувофиқлаштириб турилган
Сўнгги вақтларда Россия ва ундан ташқарида юз берган терактларнинг бари Telegram орқали мувофиқлаштирилган, шу боис Россия Федерал хавфсизлик хизмати (ФХХ)нинг Telegram фойдаланувчиларининг ёзишмаларини шифрлаш калитларини тақдим этиш ҳақидаги талаби асосли эди. Ушбу фикр «Роскомнадзор» (Россия алоқа, ахборот технологиялари ва оммавий коммуникациялар соҳасидаги назорат хизмати) раҳбари Александр Жаров томонидан билдирилди, дея хабар бермоқда Meduza.
Амалдорнинг сўзларига кўра, сўнгги вақтларда Россияда ва ундан ташқарида юз берган терактларнинг бари Telegram орқали мувофиқлаштириб турилгани ҳақидаги ахборот ФХХнинг тезкор-қидирув фаолияти натижалари билан тасдиқланган. Унинг қўшимча қилишича, ҳуқуқ-тартибот органлари ҳозирги вақтда фаолияти Россия ҳудудида тақиқланган Zello интернет-рациясига алоҳида эътироз билдирган.
«Далилларни рад этиб бўлмайди. Бизнинг мамлакатимиз ва хорижда юз берган сўнгги террорчилик ҳаракатларининг барчаси Telegram мессенжери орқали мувофиқлаштириб турилган. Шу боис, агар қулайлик ва хавфсизликдан бирини танлаш зарурати туғилса, шахсан мен хавфсизликни танлайман», — деди Жаров.
«Роскомнадзор» 16 апрель куни Россия ҳудудида Telegram’ни блок қилишни бошлади. Бунга мессенжер маъмуриятининг ФХХга фойдаланувчилар ёзишмаларининг шифрлаш калитини тақдим этмагани сабаб қилиб кўрсатилди.
Блокировка жараёнида «Роскомнадзор» тақиқланган сайтлар рўйхатига хостинг-провайдерларнинг (улар орасида Google ва Amazon ҳам бор) 20 миллиондан зиёд IP-манзилларини киритди. Шу боис Россиянинг кўплаб сайтларива сервислари фаолиятида узилишлар кузатилди. Бундан ташқари, идора Telegram’га кириш имконини берувчи 80 та VPN ва прокси-сервисларни ҳам блоклади.
«Роскомнадзор»нинг саъй-ҳаракатларига қарамай, россиялик жуда кўплаб интернет-фойдаланувчилар ҳали ҳам Telegram’дан фойдаланиш имкониятига эга бўлиб турибди.
