So‘nggi vaqtlarda Rossiya va undan tashqarida yuz bergan teraktlarning bari Telegram orqali muvofiqlashtirilgan, shu bois Rossiya Federal xavfsizlik xizmati (FXX)ning Telegram foydalanuvchilarining yozishmalarini shifrlash kalitlarini taqdim etish haqidagi talabi asosli edi. Ushbu fikr “Roskomnadzor” (Rossiya aloqa, axborot texnologiyalari va ommaviy kommunikatsiyalar sohasidagi nazorat xizmati) rahbari Aleksandr Jarov tomonidan bildirildi, deya xabar bermoqda Meduza.
Amaldorning so‘zlariga ko‘ra, so‘nggi vaqtlarda Rossiyada va undan tashqarida yuz bergan teraktlarning bari Telegram orqali muvofiqlashtirib turilgani haqidagi axborot FXXning tezkor-qidiruv faoliyati natijalari bilan tasdiqlangan. Uning qo‘shimcha qilishicha, huquq-tartibot organlari hozirgi vaqtda faoliyati Rossiya hududida taqiqlangan Zello internet-ratsiyasiga alohida e’tiroz bildirgan.
“Dalillarni rad etib bo‘lmaydi. Bizning mamlakatimiz va xorijda yuz bergan so‘nggi terrorchilik harakatlarining barchasi Telegram messenjeri orqali muvofiqlashtirib turilgan. Shu bois, agar qulaylik va xavfsizlikdan birini tanlash zarurati tug‘ilsa, shaxsan men xavfsizlikni tanlayman”, — dedi Jarov.
“Roskomnadzor” 16-aprel kuni Rossiya hududida Telegram’ni blok qilishni boshladi. Bunga messenjer ma’muriyatining FXXga foydalanuvchilar yozishmalarining shifrlash kalitini taqdim etmagani sabab qilib ko‘rsatildi.
Blokirovka jarayonida “Roskomnadzor” taqiqlangan saytlar ro‘yxatiga xosting-provayderlarning (ular orasida Google va Amazon ham bor) 20 milliondan ziyod IP-manzillarini kiritdi. Shu bois Rossiyaning ko‘plab saytlariva servislari faoliyatida uzilishlar kuzatildi. Bundan tashqari, idora Telegram’ga kirish imkonini beruvchi 80 ta VPN va proksi-servislarni ham blokladi.
“Roskomnadzor”ning sa’y-harakatlariga qaramay, rossiyalik juda ko‘plab internet-foydalanuvchilar hali ham Telegram’dan foydalanish imkoniyatiga ega bo‘lib turibdi.
Izoh (0)