Bellingcat: Донбассда Малайзия самолётини уриб туширган «Бук»ни Украинага олиб ўтишда Россия разведкаси офицери Олег Иванников қатнашган

Малайзиянинг Украинада уриб туширилган MH17 рейси билан боғлиқ халқаро тергов материалларида Андрей Иванович номи билан қайд этилган, жанговар тахаллуси «Orion» бўлган шахс — Россия Бош разведка бошқармаси (ГРУ) офицери, 1967 йилда туғилган Олег Владимирович Иванниковдир. Bellingcat тадқиқот гуруҳи аъзолари The Insider билан ҳамкорликда олиб борган қўшма суриштируви якунларига кўра шундай хулосага келди, дея хабар бермоқда Meduza.

Bellingcat тадқиқотчиларининг аниқлашича, Иванников 2006—2008 йилларда Жанубий Осетия мудофаа вазири бўлган. 2014 йили Украинадаги қуролли низо ҳудудига йўл олган: у ҳудудда «Вагнер» хусусий ҳарбий компанияси ҳаракатларини мувофиқлаштириб турган ва «Луганск халқ республикаси» маъмурияти билан муносабатлар учун масъул ҳисобланган.

Bellingcat вакилларининг қайд этишича, Иванниковнинг шахсини аниқлагач, унинг овози ҳақиқатан ҳам жанговар тахаллуси «Orion» бўлган шахсники билан мос тушишига ишонч ҳосил қилиш учун унга бир неча бор қўнғироқ қилган.

Bellingcat вакили матбуот анжуманида журналистларнинг саволларига жавоб бераркан, Россия президенти Владимир Путин ҳарбий техникалар у раҳбарлик қилаётган мамлакат чегарасидан ўтказилганини билмай қолиши мумкин бўлган вазиятни тасаввур қила олмаслигини таъкидлади.

Маълумот учун, Malaysia Airlines авиакомпаниясининг MH17 «Амстердам—Куала-Лумпур» рейси бўйлаб парвоз қилаётган «Боинг» самолёти 2014 йил июлида Донбассда уриб туширилган эди. Самолёт бортида бўлган 298 кишининг бари ҳалок бўлган.

Халқаро тергов гуруҳи 24 май куни MH17 ҳалокати билан боғлиқ янги ҳисоботни эълон қилди. Унда, жумладан, лайнер Россиянинг Курск вилоятидаги ҳаво ҳужумидан мудофаа кучлари 53-сон зенит-ракета бригадасига тегишли «Бук» мажмуаси томонидан уриб туширилгани таъкидланади.

25 май куни Нидерландия ва Австралия ҳукуматлари лайнер ҳалокати учун жавобгарликни расман Россия зиммасига юклади. Ҳар икки мамлакат расмий Москвани музокараларга чорлади, халқаро судга мурожаат қилишлари мумкинлигидан огоҳлантирди.

Россия MH17 авиаҳалокатига ўзининг алоқадорлигини рад этишда давом этмоқда. Россия Мудофаа вазирлиги халқаро комиссия томонидан кўрсатилган ракета Россия армияси қуроллари орасида йўқлигини маълум қилди.