Халқаро тергов гуруҳининг даъвоси бўйича Донбассда MH17 рейсини уриб туширган деб таъкидланаётган ракета Россия армияси қуроллари орасида бўлиши мумкин эмас эди. Бу ҳақда, Meduza’нинг ёзишича, Россия Мудофаа вазирлигининг расмий баёнотида сўз боради.
Баёнотда таъкидланишича, Россия Қуролли кучлари ихтиёридаги 1986 йилги бу турдаги ракеталарнинг бари 2011 йили хизматдан олинган, рўйхатдан чиқарилган ва утилизацияга юборилган.
Россия Мудофаа вазирлигининг қайд этишича, Украина армияси СССРнинг ҳарбий мулкини бўлиб олиш доирасида Киев ихтиёрида қолган «Бук» комплекслари учун 1991 йилдан сўнг бирорта янги ракета олмаган. Шундай қилиб, дейилади Россия Мудофаа вазирлиги баёнотида, ушбу ракетанинг Украина қуролли кучларига тегишли экани «эҳтимоли жуда катта».
24 май куни Халқаро тергов гуруҳи 2014 йил июлида Донбассда уриб туширилган MH17 ҳалокати билан боғлиқ янги ҳисоботни эълон қилди. Унда, жумладан, лайнер Россиянинг Курск вилоятидаги ҳаво ҳужумидан мудофаа кучлари 53-сон зенит-ракета бригадасига тегишли «Бук» мажмуаси томонидан уриб туширилгани таъкидланади.
Тергов қатнашчилари самолётни уриб туширган ракета бўлакларини ҳам намойиш этди — унда «9д1318869032» рақами сақланиб қолган. Терговчилар ушбу рақам орқали ракта 1986 йили Москва вилоятида ишлаб чиқарилганини аниқлаган.Россия Малайзия «Боинг»ининг уриб туширилишига ўзининг алоқадорлигини тўлиқ рад этмоқда. Халқаро тергов гуруҳи ўзининг янги ҳисоботини эълон қилганидан сўнг, Россия Мудофаа вазирлиги мамлакатнинг «Бук» ракета мажмуалари ҳеч қачон Украина билан чегарани кесиб ўтмагани ҳақида баёнот берган эди.
Изоҳ (0)