Ўзбекистон ташқи ишлар вазири Абдулазиз Комилов Уммон султонлигининг мамлакатда ўз миссиясини якунлаётган Фавқулодда ва мухтор элчиси Муҳаммад бин Саид бин Муҳаммад ал-Лаватини қабул қилди. Бу ҳақда ТИВ матбуот хизмати маълум қилди.
Суҳбат давомида қўшма кун тартибининг долзарб масалалари, жумладан, БМТ, ИҲТ ва бошқа халқаро ташкилотлар доирасидаги ҳамкорлик муҳокама қилинди.
Учрашувда томонларни қизиқтирган барча соҳаларда Ўзбекистон—Уммон муносабатларининг барқарор ва илдам тус олгани мамнуният билан қайд этилди. Таъкидланганидек, Ўзбекистоннинг Маскат шаҳридаги элчихонаси фаолиятининг бошланиши икки томонлама ҳамкорлик тарихида янги саҳифа очади.
Вазир самарали фаолияти ҳамда мамлакатлар ва халқлар ўртасидаги алоқаларни мустаҳкамлаш ва ривожлантиришдаги шахсий ҳиссаси учун элчига миннатдорлик билдирди. Янги тайинланадиган мансабларда муваффақиятлар тилади.
Мазкур лавозимда деярли 6 йил ишлаган элчи ўз навбатида Ўзбекистон ҳукумати ва ТИВга Уммон дипломатик миссияси раҳбари вазифасини бажаришда кўрсатилган кўмак учун миннатдорлик билдирди.
Изоҳ (0)