Ўзбекистонда 2017 йил давомида ва жорий йилнинг 4 ойида жами 379 нафар шахсга нисбатан жиноят ишлари реабилитация асосида тугатилди. Бу ҳақда Бош прокуратура матбуот хизмати маълум қилди.
Таққослаш учун, мамлакатда 2007—2016 йилларда 22 шахс оқланганди.
379 кишидан 15 нафари прокуратура органлари протестларига асосан айбсиз деб топилди.
Жумладан, Яшнобод туман судининг 2016 йил 25 октябрдаги ҳукмига кўра, Тошкент шаҳар божхона бошқармаси юкларни божхона кўригидан ўтказиш гуруҳи инспектори Х.Юлдашев ЖКнинг 182-моддаси 2-қисми «г» банди (бож ставкаларига таъсир қиладиган товарларга ташқи иқтисодий фаолият номенклатураси кодларини нотўғри киритиш) билан айбдор деб топилганди.
Бош прокуратура томонидан ушбу жиноят иши ўрганилиб, товарларга ташқи иқтисодий фаолият номенклатураси кодларини киритиш Х.Юлдашевнинг ваколат доирасига кирмаслиги сабабли жиноят ишини ЖПКнинг 83-моддаси 2-бандига асосан тугатиш ҳақида келтирилган протести асосида Олий суд томонидан Х.Юлдашев айбсиз деб топилиб, оқланди.
Изоҳ (0)