Шавкат Мирзиёевнинг Андижон вилоятига ўтган йилги ташрифи чоғида Андижон тумани Хакан қишлоғида трикотаж маҳсулотлари ишлаб чиқариш корхонаси ташкил этиш лойиҳаси тақдим этилган эди, деб хабар беради Президент матбуот хизмати.
Milana textile масъулияти чекланган жамияти томонидан 7 миллиард сўм ўз маблағи ва «Алоқабанк» вилоят филиалидан олинган 2 миллиард сўм кредит эвазига уч қаватли бино реконструкция қилиниб, Туркия ва Хитойдан замонавий тикув дастгоҳлари келтириб ўрнатилди.
Бугунги кунда корхонада аёллар ва болалар учун 20 турдан ортиқ трикотаж маҳсулотлари ишлаб чиқарилмоқда. Маҳсулотларнинг асосий қисми хорижга экспорт қилиниши кўзда тутилган.
Энг муҳими, тумандаги 200 нафардан ортиқ қишлоқ хотин-қизлари доимий иш ўрнига эга бўлди.
Ўзбекистон раҳбари корхона фаолияти билан танишди, ишчи-ходимлар билан мулоқот қилди.
«Сизларнинг кўзларингизни кўриб, жуда хурсанд бўлдим. Қиз боланинг кулгуси, ҳаётдан розилиги - оиланинг бахти», — деди Шавкат Мирзиёев.
Мавзуга доир: Шавкат Мирзиёев: Андижонда мавжуд бир-иккита завод бир фоиз аҳолиниям иш билан таъминлай олмайди
Изоҳ (0)