Ўзбекистон матбуот ва ахборот агентлиги Алишер Навоий номидаги Ўзбекистон Миллий кутубхонаси ва Туркия Миллий кутубхонаси ўртасида имзоланган меморандумга мувофиқ, Ўзбекистон Миллий кутубхонаси, Қорақалпоғистон Республикаси, Андижон, Фарғона, Наманган, Навоий, Қашқадарё, Сирдарё вилояти ахборот-кутубхона маркази раҳбар-ходимларидан иборат делегация Туркия Республикасининг Анқара шаҳрида бўлиб, кутубхоналар фаолияти билан яқиндан танишди. Бу ҳақда ЎзА хабар бермоқда.
Делегация аъзолари Туркия Миллий кутубхонаси, Билкент университети кутубхонаси, Жебежи халқ кутубхонаси ҳамда Меҳмет Акиф Эрсой адабиёт-музей кутубхонасида бўлди.
Туркия Миллий кутубхонаси ташаббуси билан ўзбекистонлик кутубхоначилар Анқара ва Истанбулдаги олий таълим муассасаларининг кутубхоначилик факультетида магистратура ва аспирантура босқичида Туркия томонидан тақдим этилган грант асосида ўқиши мумкин.
Туркия Миллий кутубхонасининг ёзма ва нодир асарларни тўпловчи бўлими Истанбулда жойлашган. Ёзма асарлар 400 мингдан зиёд. Бугунги кунда Миллий кутубхонада фондни рақамлаштириш ва электрон тарзда хизмат кўрсатишга алоҳида эътибор қаратилмоқда.
Изоҳ (0)