Парламент қуйи палатасидаги Ўзбекистон Халқ демократик партияси фракциясининг навбатдаги йиғилиши бўлиб ўтди. Унда Ҳисоб палатасининг 2017 йилдаги фаолияти тўғрисидаги ҳисобот эшитилди. Бу ҳақда ЎзА хабар бермоқда.
Ўтган йилда Ҳисоб палатасига юклатилган вазифа ва топшириқлар ижроси бўйича ўтказилган текшириш ва ўрганишлар (аудит) натижалари юзасидан Ўзбекистон Президентига 66 та, Вазирлар Маҳкамасига 3 та маълумотнома ва таҳлилий материаллар киритилди. Ўтказилган ўрганишлар натижасида 2145 ҳолатда 36,5 миллиард сўм ва 7 миллион долларлик ноқонуний ва самарасиз харажатлар ҳамда 38 та ҳолатда 268,3 миллиард сўм бюджет тизимига қўшимча даромад суммаси аниқланди.
Ишчи гуруҳ томонидан соғлиқни сақлаш соҳасида амалга оширилаётган ислоҳотлар ижросини таъминлаш ва амалий ёрдам кўрсатиш мақсадида жойларда ўрганиш ўтказилди. Қишлоқ оилавий поликлиникалари ҳудудида аҳоли учун арзон ва сифатли дори воситалари ҳамда тиббий буюмлар сотувини йўлга қўядиган «Дори-дармон» акциядорлик компанияси тизимидаги дорихоналарни жойлаштириш ҳамда ҳудудларда тез тиббий ёрдам шохобчаларини ташкил этиш ишлари қониқарсиз даражада эканлиги аниқланди.
Шунингдек, бирламчи тиббиёт муассасаларида умумий амалиёт шифокорлари ҳамда тор мутахассисликлар штат бирликлари шифокорлар билан тўлдирилмаганлиги, тез тиббий ёрдам бригадаларининг чақирувлар учун дори-дармон воситаларига сарфланаётган бюджет маблағлари ўрганилганда 1 та чақирув дори-дармон харажати учун ажратилаётган маблағлар республика ҳудудлари бўйича номутаносиблиги, оналик ва болаликни муҳофаза қилиш ҳолатида сезиларли ўзгаришлар йўқлиги аниқланди ва ўрганиш якуни бўйича Ҳисоб палатасининг кўрсатмаси Соғлиқни сақлаш вазирлиги ва Вазирлар Маҳкамасига юборилиши таъминланди.
Маҳаллий бюджетларга қўшимча даромад манбаларини аниқлаш мақсадида Самарқанд, Наманган ва Тошкент вилоятлари ҳамда Тошкент шаҳрининг Сергели, Олмазор ва Бектемир туманларида 2017 йилда ўтказилган ўрганиш ва таҳлиллар натижасида бюджетга қарийб 120 миллиард сўм қўшимча даромад манбалари аниқланди.
Коммунал соҳадаги текширишлар натижаларига ҳам алоҳида эътибор қаратилди. Таъкидланишича, «Тошиссиққуввати» давлат унитар корхонаси ишлаб чиқариш бирлашмасининг 2010 йил 1 январидан 2015 йил 1 июлигача бўлган даврдаги фаолияти ўрганилганда жами 516 миллиард сўмлик хато-камчиликлар аниқланди.
Изоҳ (0)