«Мулоқот News» актёр Азиз Раметов билан интервью уйиштирди. Интервьюда актёр ижод ва шахсий ҳаётдаги янгиликлар ҳақида сўзлаб берди.
— Ҳамма ота-оналар ҳам фарзандларини ўз соҳаларида кетишини хоҳлашмайди. Айниқса, саънат соҳасидагилар. Сизда бу жараён қандай кечган?
— Онам мен ҳали туғилмасимдан, 7 ойлик пайтимда «Аршин Мололон» спектаклида бош роллардан бирини ижро этган. Балки, ўша пайтданоқ менга санъат соҳаси яқиндир. Дадам кўпроқ бу соҳада кетишимга қаршилик қилган, лекин илк ижодларимни кўрганларидан кейин барибир тан олганлар. Мусиқа мактабида 9 йил таҳсил олганман. Кейинчалик дадамнинг хоҳишлари билан ҳарбий соҳани танлаганман. Ўша пайтларда ҳам устозларим мени барибир санъат соҳаси бўйича кетишимни таъкидлашарди. Мана барибир шу соҳа мени ўзига тортди.
— «Ўтов» фильмидаги ижройингиз кўпчилик эътиборини қозонган. Яна шундай ижроларни кўрамизми?
— Агар яна шунақа фильмларга таклиф қилишса жон-жон деб ўйнардим. Ундаги жараёнлар жуда қизғин кечган. Наркоман ролини ижро этганим учун режиссёримиз мени наркоманлар орасига олиб борган. Ўша инсонлар орасида улар билан гаплашиб, кўришиб ўша ҳолатга тушишимга сабабчи бўлган. Бу кино орқали ўзим ҳам жуда кўп нарсаларни ўргандим. Ўзим ҳам яна шундай асарларни яратилишини хоҳлайман... Балки сценарий ёзаётган инсон алоҳида, режиссёр алоҳида, суратга олувчи инсон алоҳида бўлиб ишлаётганлари учун шундайдир. Менимча, кино олишда бир неча режиссёрлар биргаликда ишлаши керак. Жамоа яна ҳам яқинроқ бўлиб фикрларини битта жойга жамлай олиши, яъни ҳар бирлари битта ғоя асосида бирлашиб ишлашлари керак. Агар ҳамма ўзини фикри билан ёндашса, ҳақиқий кино чиқмайди. Бизни халқимиз киноларни яхши кўради. Ҳатто жойларга борганимизда ёрдамларини ҳам аяшмайди. Улар кутган киноларни етказиб бериш керак. Шунинг устида ўзим ҳам ҳаракат қиляпман.— Илк ижод намуналарингиз орасида қўшиқлар ҳам жой олган. Унинг келажаги нима бўлди?
— Мен қўшиқ айтишни тарк этмадим. Ҳатто яқинда «Самарқанд сайёраси» номли қирқтага яқин қўшиқларим жамланган альбом чиқаряпмиз. Мусиқа мактабида таҳсил олганим учун қўшиққа нисбатан меҳрим бошқача. Ҳарбий соҳада ўқиётганимда ҳам биринчи айтган «Қора қош» қўшиғини ҳам сафни олди қисмида туриб айттиришарди. Яқинда Муниса Ризаева билан дуэт қўшиқ айтдим. Бу йўналишни ташлаб қўйиш ниятим йўқ. Яна янги замонавий йўналишда куйлаш режаларим йўқ эмас.— Режиссёрлик фаолиятини бошлашингизга нима туртки бўлди?
— Ҳарбий соҳани битирганим учун ўзим мана шу йўналишда кино олишни ўйлаб юрардим. Актёр бўлганим учун соҳа ичидаги жараёнларни яхши ўргандим. Соҳа ичига кирганингиз сайин ўзингиз излаган нарсаларни топиб бораверасиз. Менда имкон бўлиши билан фильм олиш ҳаракатини бошладим. Альбатта бу осон кечмади. Уни ҳам ўзига яраша машаққатлари бор. Мен ўзимда мана шуни уддалашга, куч топишга ҳаракат қилдим ва буни бошладим.
— Режиссёрлик фаолиятини давом эттирасизми?— Ҳа, албатта. Ҳозирда янги «Ал-Азиз» фильмини суратга олиш жараёнларини бошлаганмиз. Бу «Оловуддиннинг чироғи» фильмига қиёсий. Режиссёрлик иши анча мураккаб бўлишига қарамасдан ўзингиз учун кўп нарса оласиз, атрофдагиларга кўмак бера олсиз, тўғри йўналиш кўрсатасиз, ўзингизнинг устингизда анча ишлашингизга ҳам тўғри келади.
— Илк суратга олган «Арслон изидан» фильмингиз жараёнлари қандай кечди?
— Бу фильмни суратга олиш жараёнлари анча узоққа чўзилди. Деярли 4 йилда олишга муваффақ бўлдик. Фильмнинг ғояси ҳам шуни талаб қиларди. Афғонистонда яна бир қанча давлатларда уни суратга олишга тўғри келди. Лекин кўнглим тўлди дея олмайман. Камчиликлардан ҳоли бўлмади. Жуда кўп хатоларимни кўрдим. Кўпроқ устозлар билан маслаҳатлашишим керак экан. Балки ёшлик қилгандирмиз. Унинг давомини олиш ниятим бор. Бу кино орқали фарзандлар онгида ватанга муҳаббат руҳини янада оширишни, касбга садоқатни янада шакллантиришни, энг асосийси ўзи хоҳлаб ҳарбий бўлишни, умуман мажбур бўлмаганидан шу ишни қилишларини фильмга сингдиришга ҳаракат қилгандим.
— Ушбу фильм шу билан ниҳояланадими ёки давомлими?
— Бу фильмнинг давоми бор. Унда ўзим ҳам 2 хил ролни ижро этдим. Кўринишимни ҳам шунга мослаштирдим. Бир қарасангиз бу кўринишда, бир қарасангиз у кўринишда намоён бўламан. Кинони одамлар мен кўргандек кўради деб баъзи жойларини ўзимча талқин қилган эканман. Аслида янада соддалаштиришим керак экан. Масалан, бир-икки жойида «Орадан икки ҳафта ўтди» деб беришим керак бўлган жойлари ҳам бор экан. Мен уни ўзимча таҳлил қилиб кўраётган одам тушуниб олар деб ўйлаганман. Аслида мураккаб эмас соддалик керак. Олайлик ҳозирги «Реал хит» дастури аслида соддагина одамлар ичида юриб уларни фикрини ўрганиш, лекин ўша оддий туйилган ғоя бутун эътиборни жалб қила олди. Шунга ўхшаш фильмларга ҳам самимийлик керак деб ўйлаб қолдим.
— Шахсий ҳаётингиз борасида нима дея оласиз? Кузгача уйланиш ниятингиз борлиги ҳақидаги маълумотларни эшитганмиз?
— Миш-мишлар орқали кўпчилик мени оилали деб ҳам ўйлашади. Бундан 8—9 йил олдин «ТВ Марказ» каналида «Юлдузли пайшанба» дастури бўларди. Ўшанда акам келмай қолганлари учун фарзандини мен кўтариб тургандим. Шундан кейин кўпчилик мени уйланган деб ўйлашган. Баъзилар билмасдан тармоқларда «Болаларингиз яхшими?» деб ҳам ёзиб қолишади (кулади). Ҳали ўзим ёқтирган қизни учратганимча йўқ. Турмуш ўртоғим ҳаётда актив бўлишини хоҳлардим. Оилавий анъанани давом эттириб актрисага уйланмоқчи эмасман. Турмуш ўртоғимни, албатта, ҳурмат қиламан.
— Келгусидаги ишларингизга омад тилаб қоламиз. Самимий суҳбат учун раҳмат.
— Сизларга ҳам алоҳида раҳмат!
Изоҳ (0)