АҚШда 13 ёшли боланинг ота-онаси унинг органларини донор сифатида бериб юборишга розилик берганидан кейин, бола комадан чиқди, деб ёзади Fox News.
Алабама штатида яшовчи бола икки ойча аввал трейлер тиркамасида ўтирганида, у ағдарилиб кетиб, боланинг бошига зарб билан теккан. Натижада у оғир бош суяк-мия травмасини олган. Шифокорлар у ҳеч қачон яна нормал ҳолатга қайтмаслигини айтган.
Кислород етишмовчилиги натижасида боланинг миясига зарар етгани, шу сабабли у тирик қолган тақдирида ҳам, ҳаётни таъминлаш қурилмасига боғланиб қолиши маълум бўлгач, ота-онаси эҳтиёжманд болаларга унинг органларини бериш учун рухсатномани имзолашга қарор қилган.
Аммо болани сунъий қон айлантириш қурилмасидан узишдан бир кун аввал у кутилмаганда нафас ола бошлаган, каравотдан турган ва мураккаб гаплардан фойдаланиб мулоқот қила олган. Ҳозир бола ҳар куни талвасага тушади, бош оғриғидан азоб чекади. Аммо бола тўлиқ тузалиб кетишига умид қилмоқда.