Тошкентдаги Амир Темур хиёбонида 9 май — Хотира ва қадрлаш кунига бағишланган Болалар ҳарбий паради бўлиб ўтди, деб хабар қилади ИИББ матбуот хизмати.
ИИББ ва Ёшлар иттифоқи Тошкент шаҳар кенгаши томонидан ташкил этилган байрам тадбири ёш ўғил-қизлар қалбида ватанпарварлик туйғусининг яна мустаҳкамланишига хизмат қилди.
Дастлаб, ҳарбий оркестр садолари остида Ўзбекистон Республикасининг Давлат байроғи олиб ўтилди. Шундан сўнг, Ўзбекистон Республикасининг Давлат мадҳияси янгради.
Парадда иштирок этган Тошкент шаҳар ҳокимлиги, ҳуқуқ-тартибот органлари, жамоат ташкилотлари ва фуқаролик институтлари жамиятларининг раҳбарлари фахрийларга юзланиб, уларнинг иккинчи жаҳон урушида фашизм устидан қозонилган ғалабага қўшган ҳиссаси ва урушдан кейинги даврда юрт фаровонлиги йўлида кўрсатган хизматлари учун миннатдорлик изҳор қилдилар. Хусусан, тадбирда сўзга чиққан Тошкент шаҳар ҳокими Ж.Ортиқхўжаев, Ўзбекистон Республикаси Ички ишлар вазири ўринбосари – Тошкент шаҳар ИИББ бошлиғи Р.Жўраев, «Нуроний» жамғармаси Тошкент шаҳар бўлими раиси Р.Колонов ва бошқалар уруш фахрийларини 9 май — Хотира ва қадрлаш куни билан табриклаб уларга соғлик ва узоқ умр тиладилар.
Ўзбекистон Ёшлар иттифоқи Тошкент шаҳар Кенгаши вакиллари ижросидаги ҳарбий ватанпарварликка оид шеър ва қўшиқлари байрам тадбирига ўзгача шукуҳ бағишлади.
Шундан сўнг, мактаб, лицей шу жумладан, ИИВ 1-сон академик лицейи ўқувчилари, «Темурбеклар мактаби», «Жар» ССМ қошидаги махсус мактаб-интернати ҳамда бошқа қатор таълим муассасалари аъзолари тантанали равишда саф тортиб ўтдилар.
Ҳарбий ватанпарварлик руҳида ўтган тадбир ўз атрофига 500 дан ортиқ ёшларни бирлаштирди. Ҳарбий оркестр ижросидаги куй-қўшиқлар эса ёшларни ватанни севиш ва унга садоқатли бўлишга ундади.
Изоҳ (0)