Кеча, 2 май санасида Европа Чемпионлар Лигаси ярим финали жавоб учрашувида «Рома» ўз майдонида «Ливерпуль»ни қабул қилиб, 4:2 ҳисобида ғалаба қозонди.
Аммо бу ғалаба римликларнинг финалга чиқиши учун етарли бўлмади. Биринчи ўйиндаги 2:5 ҳисобидаги мағлубият туфайли «Рома» мусобақадаги иштирокини якунлади. Кечаги ўйинда ҳисобни очувчи голга муаллифлик қилган «Ливерпуль» аъзоси Садио Мане учун бу гол ЕЧЛнинг амалдаги мавсумида тўққизинчиси бўлди.
Айни дамда унинг жамоадошлари — Роберто Фирмино ва Муҳаммад Салоҳда эса ўнтадан гол мавжуд. Шу тариқа бир мавсумнинг ўзида 29 та гол билан «Ливерпуль» триоси сермаҳсуллик бўйича Европа Чемпионлар Лигаси рекордини янгилашга муваффақ бўлди.
Аввалги рекорд «Реал» триоси — Криштиану Роналду, Карим Бензема ва Гарет Бэйлга тегишли эди. Бу учлик 2013/2014 йилги мавсумда 28 та гол уришга эришганди.
Изоҳ (0)