Ўзбекистон хотин-қизлар қўмитаси раҳбариятида ўзгаришлар юз берди. Бу ҳақда «Xabar.uz» маълум қилди.
Наманган вилояти хотин-қизлар қўмитаси раиси бўлиб ишлаб келган Зулайҳо Маҳкамова қўмита раисининг биринчи ўринбосари этиб тайинланди. Шу пайтга қадар қўмитада биринчи ўринбосар лавозими жорий этилмаганди.
Зулайҳо Маҳкамова 1968 йили Наманган вилоятининг Янгиқўрғон туманида туғилган. Наманган давлат педагогика институти, Президент ҳузуридаги давлат ва жамият қурилиши академиясини тамомлаган.
У 2017 йил октябридан Наманган вилоят ҳокимининг ўринбосари — хотин-қизлар қўмитаси раиси сифатида ишлаб келаётган, бунгача вилоят касаба уюшма ташкилотлари бирлашмаси раиси лавозимида фаолият кўрсатган эди.
Шунингдек, қўмита раиси ўринбосари лавозимида ишлаб келган Шоира Нурматова бошқа ишга ўтгани муносабати билан унинг ўрнига Ўзбекистон миллий университети маънавият асослари ва диншунослик кафедраси профессори Мукаррам Нурматова ўринбосар этиб тайинланди.
Мукаррам Нурматова 1959 йили Қашқадарё вилоятининг Шаҳрисабз туманида туғилган. Фалсафа фанлари доктори, доцент.
Изоҳ (0)