Ўзбекистон Республикасининг Президентининг 2018 йил 19 апрелдаги фармонига асосан «Юқори технологиялар ўқув-тажриба маркази» давлат корхонаси Ўзбекистон Инновацион ривожланиш вазирлиги тасарруфига ўтказилди ва «Илғор технологиялар маркази»га айлантирилди. Бу ҳақда марказ матбуот хизмати «Дарё»га маълум қилди.
Кеча, 28 апрель куи Ўзбекистон Инновацион ривожланиш вазири Иброҳим Абдураҳмонов қайта ташкил этилган марказ ходимлари билан учрашди. Мазкур учрашувнинг мақсади ташкилотнинг янги роли, шунингдек, марказнинг тузилиши ва фаолиятини ислоҳ қилиш, унинг янги жойлашувини аниқлаш, Ўзбекистонда илм-фан ва технологияларни инновацион ривожлантиришда марказ иштирокини аниқ белгилашга қаратилган Президент фармонида белгиланган ижобий ўзгаришларни муҳокама қилиш эди.
Давлат бюджетидан молиялаштиришга ўтилиши ҳам муҳим ўзгаришлардан бирига айланди, бу том маънода марказни жонлантириш йўлида хизмат қилиши шубҳасиз, дейилади хабарда.
Муқаддам қабул қилинган қарорлар доирасида ҳам илмий жиҳатдан, ҳам инфратузилма нуқтаи назаридан ноёб ҳисобланган марказни молиялаштириш йилдан йилга 25% камайиб бораётган эди, бу эса ўз навбатида кадрлар салоҳиятининг йўқолиши, бинони ва ноёб асбоб-ускуналарни парваришлашдаги қийинчиликлар сингари қатор муаммоларнинг келиб чиқишга сабаб бўлди. Бундан ташқари марказнинг салоҳиятидан тор доирада фойдаланилар, фақат марказга оид бўлган лойиҳаларгина амалга оширилар эди.
Муассасанинг Юқори технологиялар маркази тариқасида фаолият юритиши тараққиёт сари қўйилган илк қадам экани таъкидланди, ушбу тайёргарлик босқичини ўтаб бўлинган деб ҳисоблаш мумкин ва энди олдинга–юқори технологиялардан илғор технологиялар сари ҳаракатланиш фурсати етди. Шу боис Марказни илғор технология марказига айлантириб, Инновацион ривожланиш вазирлигига топшириш ғояси туғилди. Барча олиб борилаётган саъй-ҳаракатлар марказни қўллаб-қувватлаш ва уни мамлакатдаги жараёнларга интеграция қилиш масалалари бўйича кенг истиқболларни очиб беради, дейилади хабарда.
Изоҳ (0)