“Yuqori texnologiyalar o‘quv-tajriba markazi” “Ilg‘or texnologiyalar markazi”ga aylantirildi

O‘zbekiston Respublikasining Prezidentining 2018-yil 19-apreldagi farmoniga asosan “Yuqori texnologiyalar o‘quv-tajriba markazi” davlat korxonasi O‘zbekiston Innovatsion rivojlanish vazirligi tasarrufiga o‘tkazildi va “Ilg‘or texnologiyalar markazi”ga aylantirildi. Bu haqda markaz matbuot xizmati “Daryo”ga ma’lum qildi.

Kecha, 28-aprel kui O‘zbekiston Innovatsion rivojlanish vaziri Ibrohim Abdurahmonov qayta tashkil etilgan markaz xodimlari bilan uchrashdi. Mazkur uchrashuvning maqsadi tashkilotning yangi roli, shuningdek, markazning tuzilishi va faoliyatini isloh qilish, uning yangi joylashuvini aniqlash, O‘zbekistonda ilm-fan va texnologiyalarni innovatsion rivojlantirishda markaz ishtirokini aniq belgilashga qaratilgan Prezident farmonida belgilangan ijobiy o‘zgarishlarni muhokama qilish edi.

Davlat budjetidan moliyalashtirishga o‘tilishi ham muhim o‘zgarishlardan biriga aylandi, bu tom ma’noda markazni jonlantirish yo‘lida xizmat qilishi shubhasiz, deyiladi xabarda.

Muqaddam qabul qilingan qarorlar doirasida ham ilmiy jihatdan, ham infratuzilma nuqtai nazaridan noyob hisoblangan markazni moliyalashtirish yildan-yilga 25% kamayib borayotgan edi, bu esa o‘z navbatida kadrlar salohiyatining yo‘qolishi, binoni va noyob asbob-uskunalarni parvarishlashdagi qiyinchiliklar singari qator muammolarning kelib chiqishga sabab bo‘ldi. Bundan tashqari markazning salohiyatidan tor doirada foydalanilar, faqat markazga oid bo‘lgan loyihalargina amalga oshirilar edi.

Muassasaning Yuqori texnologiyalar markazi tariqasida faoliyat yuritishi taraqqiyot sari qo‘yilgan ilk qadam ekani ta’kidlandi, ushbu tayyorgarlik bosqichini o‘tab bo‘lingan deb hisoblash mumkin va, endi oldinga – yuqori texnologiyalardan ilg‘or texnologiyalar sari harakatlanish fursati yetdi. Shu bois Markazni ilg‘or texnologiya markaziga aylantirib, Innovatsion rivojlanish vazirligiga topshirish g‘oyasi tug‘ildi. Barcha olib borilayotgan sa’y-harakatlar markazni qo‘llab-quvvatlash va uni mamlakatdagi jarayonlarga integratsiya qilish masalalari bo‘yicha keng istiqbollarni ochib beradi, deyiladi xabarda.