Интерпол Индонезияга аёлларни олиб кетиб, фоҳишаликка мажбурлаган самарқандлик шахсни аниқлади

Ўзбекистон Миллий ахборот агентлиги Интерполнинг Ўзбекистондаги Миллий марказий бюроси бошлиғи Рустам Исроилов билан интервью уюштирди.

Унинг сўзларига кўра, Ўзбекистон Интерполга аъзо бўлган вақт (1994 йил)дан буён жуда кўп нарсалар ўзгарди. Жиноятчилик турлари кўпайиши ва кўлами кенгайиши билан бир қаторда миграция оқими мисли кўрилмаган даражада кучайди.

«Айни пайтда глобал муаммолардан саналган одам савдоси жинояти тез-тез учраб турибди. Асосан аёлларни алдаб, қулликка, турли тубан ишларга маҳкум этаётган жиноий гуруҳлар илдизига болта уриш долзарб бўлиб турибди. Бу борада Индонезия давлатида узоқ вақт яшаб, ўрнашиб, кейин катта жиноий уюшмага асос солган, аёлларни турли йўллар билан олиб кетиб, фоҳишаликка мажбур этган самарқандлик шахс аниқланди. Уни Интерпол имконияти бўйича қидириб топиб, қўлга олиш ва мамлакатга қайтариш чораси кўрилди», — деди Рустам Исроилов.

Шунингдек, у Интерполнинг ташаббуси ва кўмаги асосида Тошкентда 2018 йил 30 апрель — 4 май кунлари ўтказилиши кутилаётган одам савдоси бўйича семинарда дунёнинг 14 давлатидан вакиллар иштирок этишини айтди.

«Семинарда одам савдоси жиноятининг бугунги ҳолати, унинг турлари, кўлами ва унга қарши курашиш бўйича янги услублар, имкониятлар, барча-барчаси ҳақида фикр алмашилади. Бу борада ўзаро ҳамкорлик масалалари муҳокама қилинади. Бу жиноятни содир этиб, қочиб юрган шахсларни қидириб топиш, уларни ўз мамлакатига қайтариш, суд ҳукмига ҳавола этиш юзасидан чора-тадбирлар белгилаб олинади», — деди Интерполнинг Ўзбекистондаги Миллий марказий бюроси бошлиғи.