O‘zbekiston Milliy axborot agentligi Interpolning O‘zbekistondagi Milliy markaziy byurosi boshlig‘i Rustam Isroilov bilan intervyu uyushtirdi.
Uning so‘zlariga ko‘ra, O‘zbekiston Interpolga a’zo bo‘lgan vaqt (1994-yil)dan buyon juda ko‘p narsalar o‘zgardi. Jinoyatchilik turlari ko‘payishi va ko‘lami kengayishi bilan bir qatorda migratsiya oqimi misli ko‘rilmagan darajada kuchaydi.
“Ayni paytda global muammolardan sanalgan odam savdosi jinoyati tez-tez uchrab turibdi. Asosan ayollarni aldab, qullikka, turli tuban ishlarga mahkum etayotgan jinoiy guruhlar ildiziga bolta urish dolzarb bo‘lib turibdi. Bu borada Indoneziya davlatida uzoq vaqt yashab, o‘rnashib, keyin katta jinoiy uyushmaga asos solgan, ayollarni turli yo‘llar bilan olib ketib, fohishalikka majbur etgan samarqandlik shaxs aniqlandi. Uni Interpol imkoniyati bo‘yicha qidirib topib, qo‘lga olish va mamlakatga qaytarish chorasi ko‘rildi”, — dedi Rustam Isroilov.
Shuningdek, u Interpolning tashabbusi va ko‘magi asosida Toshkentda 2018-yil 30-aprel — 4 may kunlari o‘tkazilishi kutilayotgan odam savdosi bo‘yicha seminarda dunyoning 14 davlatidan vakillar ishtirok etishini aytdi.
“Seminarda odam savdosi jinoyatining bugungi holati, uning turlari, ko‘lami va unga qarshi kurashish bo‘yicha yangi uslublar, imkoniyatlar, barcha-barchasi haqida fikr almashiladi. Bu borada o‘zaro hamkorlik masalalari muhokama qilinadi. Bu jinoyatni sodir etib, qochib yurgan shaxslarni qidirib topish, ularni o‘z mamlakatiga qaytarish, sud hukmiga havola etish yuzasidan chora-tadbirlar belgilab olinadi”, — dedi Interpolning O‘zbekistondagi Milliy markaziy byurosi boshlig‘i.
Izoh (0)