Молия вазирлиги давлат қабул комиссиялари фаолияти юзасидан сўров эълон қилди

Бугунги кунда давлат дастурлари асосида бир қанча ижтимоий соҳа объектлари янгидан қурилиб, реконструкция ва капитал таъмирланиб фойдаланишга топширилмоқда. Бу ҳақда Молия вазирлиги хабар бермоқда.

Амалдаги қонунчиликка кўра ушбу объектлар Давлат қабул комиссиялари томонидан фойдаланишга қабул қилинади. Масалан, Қорақалпоғистоннинг Шуманай туманидаги марказий ўйингоҳга трибуна қурилиши объекти қуйидаги комиссияси аъзолари томонидан фойдаланишга қабул қилинган.

Жисмоний тарбия ва спорт ишлари вазири;

Қурилиш вазири ўринбосари;

Молия вазири ўринбосари;

Соғлиқни сақлаш вазири ўринбосари;

Болалар спортини ривожлантириш жамғармаси директори;

«Ўзшаҳарсозлик ЛИТИ» акционерлик жамияти раиси;

Шунингдек, ҳудудий ҳокимликлар ва тегишли бошқармалар бошлиқлари.

Кўриниб турибдики, республиканинг олис туманларида бажарилган қурилиш ишларини фойдаланишга қабул қилиш учун ҳам Тошкент шаҳрида жойлашган 6 та вазирлик ва идоралар раҳбарларидан имзо олиниши лозим. Яъни, мазкур вазирлик ва идоралар раҳбарлари фойдаланишга топшириладиган объектларни жойига чиққан ҳолда кўриб чиқишлари талаб этилади. Бу эса маълум бир вақтни талаб этади.

Бунинг оқибатида, кўп ҳолларда юқорида қайд этилган раҳбарларнинг объектга чиқмасдан, бажарилган қурилиш-таъмирлаш ишларининг сифатини кўрмасдан туриб, қурилиш-таъмирлаш ишлари бажарилган ижтимоий соҳа объектларини фойдаланишга қабул қилиш баённомаларига имзо қўйиш ҳолатлари кузатилмоқда.

Шундан келиб чиқиб, ортиқча оворагарчиликларни олдини олиш ҳамда фойдаланишга топшириладиган объектларда бажарилган қурилиш-таъмирлаш ишларининг сифатини назорат қилиш имкониятини ошириш мақсадида, объектларни фойдаланишга топшириш давлат қабул комиссияси аъзоларини қайта кўриб чиқиш лозим деб ҳисобланмоқда.

Ушбу масала юзасидан Молия вазирлиги аҳоли фикрини ўта муҳим деб ҳисоблаган ҳолда сўров ўтказишни лозим деб топди.

Саволлар:

1-вариант: Қурилиш-таъмирлаш ишлари бажарилган ижтимоий соҳа объектларини фойдаланишга қабул қилишда амалдаги давлат қабул комиссияси аъзоларини сақлаб қолиш.

2-вариант: Қурилиш-таъмирлаш ишлари бажарилган объектларни қабул қилишда давлат қабул комиссияси аъзоларини фақатгина ҳудудий ҳокимликлар ва бошқармаларидан киритиш.

3-вариант: Қурилиш-таъмирлаш ишлари бажарилган объектларни қабул қилишда давлат қабул комиссиясининг фақатгина раисини фойдаланишга қабул қилувчи ташкилотнинг юқори турувчи органидан (вазирлик ва идоралар раҳбарлари) ва аъзоларини ҳудудий ҳокимликлар ва бошқармалар вакилларидан иборат таркибни тасдиқлаш. Шунингдек, комиссия аъзолигига халқ депутатлари вакиллари ва маҳалла фуқаролар йиғинлари раисларини ҳам киритиш.

4-вариант: Сизнинг вариантингиз.

Вариант кўрсатилган ҳолда таклиф ва мулоҳазалар қолдириш сўралади. Сўров 2018 йилнинг 10 майига қадар ўтказилади.