Бугун,

  • USD 11095.31
  • RUB 173.84
  • EUR 10772.44

Бугун, 20 апрель куни Самарқандда янги футбол мавсумининг очилиш маросими ўтказилади. Вилоятнинг бош жамоаси «Динамо» куннинг ўзида иккита учрашувда иштирок этади. Бу ҳақда клуб матбуот хизмати маълум қилган.

Фото: «Динамо»

Фото: «Динамо»

Учрашувдан олдин эса стадионда соат 17:00 дан бошлаб, ўзбек футболида «анъана»га айланиб бораётган мусиқий концерт дастури бўлиб ўтади. Унда хонанда ва эстрада қўшиқчилари мухлисларни ўз чиқишлари билан хурсанд этишга ҳаракат қилади.

Аввалига жамоа соат 18:00 да Тожикистоннинг «Хўжанд» клуби билан ўртоқлик учрашувида майдонга тушади. Бу ўйин Самарқанд ва Тожикистоннинг Сўғд вилояти ҳокимиятларининг ҳамкорлиги ва ўзаро келишуви асосида ташкил қилинади.

Ушбу ўйин якунига етгач эса соат 20:00 да «Динамо» Про-Лига 3-тури доирасида Муборакнинг «Машъал» клубига қарши тўп суради.

«Трибуна»нинг ёзишича, мазкур ўртоқлик ўйини сабаб Тожикистон футбол федерацияси миллий чемпионат доирасидаги «Хўжанд» ва «Кўктош» жамоалари учрашувини бошқа муддатга қолдирган. Натижада 21 апрель куни ўтказилиши лозим бўлган учрашув кечроқ муддатда ўтказилади.

Хўш, ўз-ўзидан савол туғилади. Нима сабабдан ПФЛ «Динамо»нинг ўйинини бошқа муддатга кўчирмади? Клуб бу борада ПФЛга хат билан мурожаат қилмадими?

Масалага ойдинлик киритиш мақсадида ПФЛга мурожаат қилдик.

Про-Лига 3-туридан жой олган «Машъал»га қарши учрашувни суришни сўраб, «Динамо» футбол клуби эмас, Самарқанд вилояти ҳокимиятидан хат келиб тушди. Тақвим шундоқ ҳам зич эканлигидан келиб чиқиб, қолаверса расмий ўйиннинг аҳамияти ўртоқлик ўйинидан устун туришини инобатга олиб, ПФЛ «Машъал»га қарши учрашувни қолдирмаслик борасида қарор чиқарди ҳамда ҳокимиятга жавоб хатини юборди. «Динамо» эса исталган бўш кунда ўртоқлик ўйинини ташкил қилиши мумкин эди. ЎФА ҳамда ПФЛ Тожикистон билан муносабатлар илиқлашиб бораётганини қадрлайди. Яқинда МОҚ президенти Умид Аҳмаджонов Душанбеда бўлиб, Тожикистон Миллий олимпия қўмитаси ҳамда футбол федерацияси раҳбарияти билан яқин ҳамкорлик алоқаларини йўлга қўйиб қайтди. Келгусида икки мамлакат футбол жамоалари ўртасидаги ўйинлар, албатта, кўпаяди. Бироқ ҳар қандай ҳолатда ҳам расмий учрашувлар биринчи ўринда бўлиб, ўртоқлик ўйинлари шунга қараб тузилиши керак.

ПФЛ маъмурияти

Маълумки, жорий йилнинг 1 март санасида Самарқанд вилояти ва Тожикистон Республикасининг Сўғд вилояти ўртасидаги «Жартепа» ва «Саразм» автомобиль ўтказиш пунктлари қайтадан очилиб, очилиш маросимида Самарқанд вилояти ҳокими Туробжон Жўраев ва Сўғд вилояти ҳокими Ражаббой Аҳмадзода қатнашганди. Ҳокимлар ўша учрашувда икки давлат вилоятларининг ҳар жабҳада ҳамкорлик қилишига келишиб олган. Бу вақтда эса Про-Лига тақвими ҳали қайтадан тузилмаган эди. Маълумот учун Про-Лига формати ўзгартирилиб, 27 март санасида янги мавсумга қайта қуръа ташлаш маросими бўлиб ўтди.

Хўш, ПФЛнинг қарори қанчалик тўғри? Масалага Ўзбекистон ҳамда қўшни Тожикистон давлати дўстлиги, ҳамкорлиги жиҳатдан ёндашиладиган бўлса, ПФЛ Самарқанд ҳокимлиги илтимосини қондириб, «Динамо»нинг «Машъал»га қарши ўйинини қолдириши мумкин эди. Зеро, бу орқали Сўғд вилоятидан келадиган футболчилар ҳамда мухлислар учун бир мунча қулайлик яратилган бўларди. Шу ўринда яна савол пайдо бўлади. Самарқанд вилояти ҳокимлиги мазкур учрашувни ташкил қилишдан аввал Про-Лига тақвимидан хабардормиди?

Бу борада аниқлик киритиш учун «Динамо» матбуот хизматига мурожаат қилдик.

Март ойи аввалида Самарқанд вилояти ҳокими Туробжон Жўраев ва Сўғд вилояти ҳокими Ражаббой Аҳмадзода ўзаро учрашувда вилоят жамоларининг ўртоқлик ўйини борасида келишувга эришишган. Шу келишув доирасида «Динамо»нинг 20 апрель куни «Хўжанд» жамоасига қарши ўртоқлик ўйинида майдонга тушиши белгиланган эди. Ўртоқлик ўйини Про-Лига ўйинига тўғри келиб қолганлиги сабаб, ПФЛга учрашув муддатини ўзгартириш борасида мурожаат қилинди. Аммо ПФЛ регламентга кўра, ўйин ўз муддатида ўтказилиши керак деган жавобни берди. Бу норасмий ўроқлик ўйини бўлганлиги сабаб, учрашув 18:00 га, мухлислар учун қулай вақтга кўчирилди. Стадионда барча шароитлар муҳайё қилинган. «Динамо» ушбу учрашувга аралаш таркибни ташлайди. Ўртоқлик ўйини икки халқ ҳамкорлиги, дўстлиги белгиси сифатида ташкил этилмоқда.

«Динамо» матбуот хизмати

Аввалроқ ЎФА ва ПФЛ келишган ҳолда Суперлига ўйинларини Рамазон ойида ифторлик ҳамда таровеҳ намозлари вақтига мослаштириши маълум қилинганди. Шунингдек, Россияда бўлиб ўтадиган футбол бўйича Жаҳон Чемпионати вақтида ҳам Суперлига ўйинлари вақтинча тўхтатиб турилиши аниқ бўлиб улгурди. Бу қарорларнинг мухлислар талабидан келиб чиқиб, қабул қилинаётгани қувонарли.

Шунингдек, ўйинга 1 ёки 2 кун қолганда эмас, салкам бир ой муддат аввалдан эълон қилинаётгани ҳам мухлисларнинг ноқулай ҳолатга тушишини олдини олади. Аммо шу ўринда тақвим барибир ўзгаришларга учрамоқда. Буни табиий қабул қилиш лозим. Зеро, Европанинг кучли бешлик чемпионатларида ҳам маълум сабабларга кўра (еврокубок ўйинлари сабаб, кубок ўйинлари сабаб) ўйинлар муддати ўзгаради. Аммо ўртоқлик учрашуви сабаб, миллий чемпионатдаги ўйинлар вақти ўзгартирилгани кузатилмаган.

Шундай экан ПФЛнинг тақвимни ўзгартирмасликка қарор қилганини хато деб бўлмайди.

Изоҳ
Асосий янгиликлар
Дунё
Туркия ва Суриядаги зилзила нега ҳалокатли оқибатларга олиб келди?
Маҳаллий
“Қардошларимизга ҳамдардмиз”. Ўзбек жамоатчилиги Туркиядаги зилзилага муносабат билдирди
Маҳаллий
Шавкат Мирзиёев ҳарбий хизматга навбатдаги чақирув бўйича қарорни имзолади