Аввал маълум қилганимиздек, Вазирлар Маҳкамасида бош вазир Абдулла Арипов раислигида жамоат ишларига мажбурий жалб қилишни тақиқлаш, бу борада раҳбарлар масъулиятини оширишга бағишланган йиғилиш бўлиб ўтди. Йиғилишда бир қатор мансабдор шахсларга ҳайфсан берилди.
Жумладан, Андижон вилояти ҳокимининг ўринбосари Раҳмонов ва Андижон шаҳар ҳокими Дилмурод Раҳматуллаевга соғлиқни сақлаш, таълим соҳаси вакилларини кўчаларни ободонлаштириш мақсадида ўз ҳисобларидан қиммат гул кўчатларини сотиб олишга мажбурлагани учун ҳайфсан эълон қилинди.
Йиғилишда Фарғона вилояти ҳокими Шуҳрат Ғаниев Фарғона ва Марғилон шаҳарларидаги ободонлаштириш ишларига коллеж ўқитувчилари жалб этилганини тан олди. Вилоятга ажратилган 84 миллиард сўмдан фақат 5 миллиард ўзлаштирилганини қайд этди.
«Ваъда бераман, таълим, тиббиёт ва бошқа бюджет ташкилотлари вакиллари мажбурий меҳнатга жалб этилса чора кўрилади», деди ҳоким.
Қашқадарё вилояти ҳокими Зафар Рўзиев Президентнинг вилоятга ташрифи чоғида кўзбўямачиликка йўл қўйилганини тан олиб, бундан буён ҳеч қачон ўқитувчилар, шифокорлар, талабалар мажбурий меҳнатга жалб этилмаслигига ваъда берди.
Самарқанд вилояти ҳокими Туробжон Жўраев Каттақўрғонда ўқитувчи билан юз берган фожиа барчани қаттиқ қайғуга солгани ҳақида гапирди.
Эндиликда онасиз қолган етимни шахсан оталиққа олгани, туман халқ таълими бўлими бошлиғи ишдан бўшатилганини таъкидлади.
Хоразм вилояти ҳокими Илгизар Собиров ижтимоий соҳа вакилларини мажбурий меҳнатга жалб қилиш ҳолатларининг олдини олиш бўйича аниқ чора-тадбирлар ишлаб чиқилгани, шунингдек, вилоятда ишсизликнинг олдини олишга эътибор қаратилаётгани ҳақида гапирди.
Вилоят ҳокими жорий йил биринчи чорагида 4,5 минг киши иш билан таъминлангани, бунинг учун ажратилган 41 миллиард сўм маблағдан 2 миллиарди сарфланганини маълум қилди.
Бош вазир ажратилган маблағларни мақсадли сарфлаш лозимлиги, ҳозирча вилоятда бу борада ишлар қониқарли эмаслигини танқид қилди.
Изоҳ (0)