Tengelmann Group холдинги раҳбари Карл-Эриван Хаубнинг оиласи унинг тирик қолганидан умидини узди. Бу ҳақда холдинг томонидан 12 апрель жума куни эълон қилинган баёнотда билдирилган, дея хабар беради Euronews.
«Музлик ҳудудидаги экстремал иқлим шароитларида омон қолишнинг бошқа имкони йўқ», — дейилади баёнотда.
58 ёшли миллиардер Хауб Италия ва Швейцария чегарасидаги Альп тоғларида бундан бир ҳафта аввал йўқолиб қолди. У Швейцариянинг Серматт шаҳридаги тоғ-чанғи курортида жойлашган меҳмонхонада тунаб қолиб, кейинчалик бир ўзи Кляйн-Маттерхорн чўққисини забт этишга отланган эди.
Миллиардернинг оиласи у ўзи иштирок этиши лозим бўлган учрашувга келмаганидан сўнг хавотирга тушди ва қидирув ишларини бошлади. Бироқ бу уринишлар натижа бермади.
Маълумот учун, OBI ва Кик дўконлари тармоғига эгалик қилувчи Хаублар Германиянинг энг бадавлат оилаларидан бири ҳисобланади ва 6,4 миллиард доллар атрофидаги мол-мулкка эга.
Изоҳ (0)