АҚШ Мудофаа вазирлигининг фикрича, халқаро коалиция Сурияга берилган авиазарбалар давомида керакли нишонларнинг барини йўқ қилишга муваффақ бўлган. Бу ҳақда, Meduza’нинг хабар беришича, Пентагон вакиллари Дана Уайт ва генерал Кеннет Маккензи маълум қилган.
Америка ҳарбийларининг маълумотларига кўра, 14 апрелга ўтар кечаси Суриядаги уч нишонга жами 105 та ракета отилган. Бунга жавобан Сурия ҳарбийлари «ер-ҳаво» таснифидаги 40 та ракета учирган. Генерал Маккензи Суриянинг авиазарбалар вақтидаги мудофааланишга уринишини самарасиз деб атади.
Пентагоннинг фикрича, Америка авиазарбалари Суриянинг кимёвий қурол ишлаб чиқариш дастурини ривожлантириш бўйича қобилиятларини бир неча йил ортга суриб юборган.
14 апрелга ўтар кечаси АҚШ, Буюк Британия ва Франция Суриядаги бир неча нишонга авиазарбалар берди; таъкидлашларича, зарбалар Сурияда кимёвий қурол ишлаб чиқариш дастури учун жалб этилган объектларга қарши қаратилган эди. Ушбу жанговар операция Суриянинг Дума шаҳрида ҳукумат кучлари томонидан кимёвий қурол воситасида ҳужум амалга оширилгани, бунинг оқибатида 70 киши ҳалок бўлгани ҳақидаги хабарларга жавоб бўлди.
Россия Мудофаа вазирлиги маълумотларига кўра, Сурия ҳаво ҳужумидан мудофаа кучлари халқаро коалиция ҳарбийлари томонидан отилган 100 дан зиёд қанот ракеталардан 71 тасини тутиб қолишга муваффақ бўлган.
Изоҳ (0)