Ўзбекистонда йил бошидан бери чақалоқларни ташлаб кетиш ёки уларнинг жонига қасд қилиш билан боғлиқ бир неча шов-шувли воқеа юз берди (янги туғилган чақалоғини сотишга уринганлар ҳам алоҳида бир мавзу). Масалан, 3 февраль куни Фарғона вилоятининг Бувайда туманида 1981 йилда туғилган уйининг ҳожатхонасида ўғил туғиб, сўнг уни ўлдириш мақсадида совуқда қолдирган; чақалоқнинг жасади уч кун қаровсиз қолиб кетган. Ёки Хоразм вилоятининг Янгибозор туманида юз берган воқеани олайлик — 21 яшар хотин 15 февраль куни ўз уйида қиз туғиб, сўнг уни ўраб, яшириб қўйган; бу ҳолат фақат 17 февраль куни — аёл туғишдан кейинги асоратлар билан касалхонага ётқизилгач маълум бўлган. 16 февраль куни Наманган шаҳридаги чиқиндихоналарнинг биридан янги туғилган чақалоқнинг жасади топилган бўлса, 5 март куни Наманган вилоятининг Норин туманида фермада ишлаётган 22 ёш қиз ҳожатхонада қиз туғиб, сўнг уни ҳожатхонага ташлаб юборгани аниқланган эди. Шунга ўхшаш ҳолат Сурхондарё вилоятининг Қизириқ туманида ҳам юз берди.
Бу — аксарияти бўйича гумонланувчилар аниқ бўлган, улар қўлга олинган ҳолатлардир. Бу ҳолатлар бўйича гумон қилинаётган шахсларнинг ҳаракатлари ёки ҳаракатсизликларига, вақти-соати билан, суд органлари тегишли баҳо беради. Пойтахт Тошкентда эса янги туғилган чақалоқларни кўчада ташлаб кетиш ҳолатлари айниқса кўп юз берди. Эҳтимол бундай ҳолатлар мамлакатнинг бошқа ҳудудларида ҳам содир этилаётгандир, эҳтимол бу каби ҳодисалар Тошкентнинг ўзида ҳам хабар қилинаётганидан-да кўпроқдир асли. Бу борада бир нарса дейиш қийин, бироқ қуйида келтирилаётган ва асосий қисми ички ишлар органлари томонидан маълум қилинган ҳолатларнинг ўзи ҳам маълум бир хулосалар чиқариш учун етарли бўлса керак.
27 январь. Шу куни соат 14:00 атрофида Тошкентнинг Сергели тумани Лутфикор 4-тор кўчасида яшовчи фуқаро уйи олдига яқинлашганида спорт сумкасига солинган, янги туғилган ўғил бола чақалоқни топиб олиб, бу ҳақда ИИБга хабар берган. Чақалоқ касалхонага ётқизилган ва ўша заҳоти уни ташлаб кетган шахсни аниқлаш чораларини кўриш ишлари бошланган.
12 февраль. Шу куни соат 14:00 атрофида ёши тахминан 17—20 лар оралиғидаги номаълум аёл Навоий кўчасидаги Марказий дорихона олдида турган бошқа икки аёлнинг ёнига келиб, улардан бир ҳафталик чақалоғини ушлаб туришни илтимос қилган. Болани уларга бериб, сўнг ўзи яширинган. Ўшанда Республика ИИВ Жамоатчилик ва оммавий ахборот воситалари билан алоқалар бошқармаси чақалоқни ташлаб кетган аёлни аниқлаш чоралари кўрилаётгани, суриштирув ишлари бошланганини маълум қилган эди.
5 март. Шу куни Сергели тумани ИИБга тумандаги кўп қаватли уйлардан бирининг хонадони эшиги олдида янги туғилган, соғлом қиз чақалоқ топиб олингани ҳақида хабар келиб тушган. «Чақалоқ шифохонага ётқизилди ва унинг онасини аниқлаш чоралари кўрилди. Суриштирув ишлари олиб борилмоқда», — дея 7 март куни хабар берганди ИИВ Жамоатчилик ва оммавий ахборот воситалари билан алоқалар бошқармаси.
13 март. Сергели туманидаги чиқиндихоналарнинг биридан чақалоқ жасади топилди. Бу ҳақда ижтимоий тармоқларда фотохабарлар қолдирилди.
1 апрель. Бу Тошкентда чақалоқларнинг кўчада ташлаб кетилиши билан боғлиқ жамоатчилик хабар топган ҳозирча сўнгги ҳодиса — кеч соат 22:00 атрофида Чилонзор тумани 17-мавзе 1-уй 1-йўлакдаги хонадон эшиги тагига матога ўралган 7—10 кунлик соғлом қиз чақалоқ ташлаб кетилган. Бу воқеа ҳақида, жумладан, «Ёшлар» телеканалининг «Давр» информацион дастурида ҳам лавҳа берилди.
Хусусан, Учтепа тумани 3-сонли болалар клиник шифохонаси бўлим мудири Дилфуза Сатторова «Давр»га берган интервьюсида чақалоқ барча текширувлардан ўтказилгани ва амалий соғлом деб топилганини маълум қилди. «Боланинг ҳужжатлари расмийлаштирилиб, у Шаҳар гўдаклар уйига ўтказилади», — деганди Сатторова хоним.
Ҳолат юзасидан Чилонзор тумани Ички ишлар органлари фаолиятини мувофиқлаштириш бошқармаси 5-сонли ички ишлар бўлими бошлиғи Султонмурод Мирзашарипов ҳам баёнот бериб, чақалоқни ташлаб кетган шахс албатта топилишини таъкидлаган эди.
Биз бу чақалоқни ким ташлаб кетганини албатта топамиз. Ҳудудимиздаги кўп қаватли уйларнинг ҳаммасига кузатув камералари 100 фоиз ўрнатилган. Суриштирув ишлари олиб бориляпти. Тез кунларда, чақалоқни ташлаб кетган шахсни топиб, натижаси ҳақида яна сизлар («Давр») орқали халқимизга ахборот етказишга ваъда берамиз.Қайд этиш жоиз, бу ички ишлар органлари вакилининг чақалоқни ташлаб кетган шахсни топиш ва топилган заҳоти бу ҳақда жамоатчиликка маълум қилиш ҳақида ваъда бериши билан боғлиқ биринчи ҳолатдир. Эслатиб ўтамиз, аввалроқ Тошкентда 27 январь, 12 февраль, 5 март, 13 февраль кунлари, Наманганда 16 февраль куни чақалоқлар ташлаб кетилгани маълум бўлган эди, уларнинг баъзилари ҳатто ҳалок ҳам бўлган, бироқ шу вақтгача бу ҳолат бўйича гумонланувчилар топилган-топилмагани ҳақида бирор ахборот берилгани йўқ.Султонмурод Мирзашарипов, Чилонзор ИИО ФМБ 5-сонли ички ишлар бўлими бошлиғи
Шу ўринда, юқорида таъкидлаб ўтилган бир фикрни яна, бироз тўлдириб такрор келтириш мақсадга мувофиқ бўлса керак — эҳтимол бундай ҳолатлар Ўзбекистоннинг бошқа ҳудудларида ҳам содир этилаётгандир, эҳтимол бу каби ҳодисалар Тошкентнинг ўзида ҳам хабар қилинаётганидан-да кўпроқдир асли, эҳтимол бу каби аянчли воқеалар аввалги йилларда ҳам кўплаб содир этилгандир. Фақат сўнгги бир йил—ярим йилдан бери ҳуқуқни муҳофаза қилиш органлари нисбатан очиқ, нисбатан шаффоф фаолият олиб бораётгани сабаб Ўзбекистонда шу каби қилмишлар содир этилаётганидан жамоатчилик хабар топмоқда.
Бундай очиқлик, бундай шаффофликнинг, албатта, зараридан фойдаси кўпроқ. «Одамларнинг дийдаси қотиб кетади», дегувчилар ҳам қайсидир маънода ҳақ, лекин юз бераётган салбий ҳолатлар айтилмаса, кўрсатилмаса, улар ўз-ўзидан йўқ бўлиб қолмаслигини ҳам тушунмоқ керак — шу каби ҳолатлар очиқ айтилмас экан, бу ҳолатларни келтириб чиқараётган муаммоларнинг туб илдизларига ҳам етиб бўлмайди. Маълум бир ҳудуд эмас, балки бутун мамлакат миқёсида бундай қилмишларнинг содир этилаётгани жамоатчилик сезмай қолган, балки кўриб кўрмаганликка олган, тан олгиси келмаётган қандайдир бир воқелик юз бераётгани, балки юз бериб бўлганидан дарак бўлса не ажаб.
Изоҳ (0)