Фарғона вилояти Бувайда туманида ўтказилган мониторинг жараёнида тижорат банклари томонидан 259 та иссиқхона қурилиши, 11 806 бош парранда ва лимон кўчатлари сотиб олиниши учун ажратилган жами 2 миллиард 171 миллион сўмлик кредит маблағлари ўз эгаларига етиб бормагани ёки бошқа асосларга кўра жойида мавжуд эмаслиги аниқланди. Бу ҳақда «Адолат» социал-демократик партияси сайтига жойланган хабарда айтилади.
Шу боис Фарғона вилоят прокуратураси томонидан ТИФ «Миллий банк», АТ Халқ банки ва «Агробанк»нинг туман филиаллари ҳамда тумандаги агрофирмалар мансабдор шахсларига нисбатан Жиноят кодексининг 205-моддаси (Ҳокимият ёки мансаб ваколатини суиистеъмол қилиш), 2-қисми, «а» банди ва 167-моддаси (Ўзлаштириш ёки растрата йўли билан талон-тарож қилиш), 3-қисми, «а» банди билан жиноят ишлари қўзғатилди. Айни пайтда эса тергов ҳаракатлари якунланиб, жиноят ишлари айблов хулосаси билан бирга судга оширилди.
«Ушбу банкларнинг вилоят филиаллари ёки Ўзбекистон Республикаси Марказий банкининг Фарғона вилоят бош бошқармаси томонидан жойларда кредитларнинг мақсадли сарфланиши юзасидан тўлақонли мониторинг олиб борилганида эди, юқоридаги каби нохуш ҳолатларга йўл қўйилмасди», — дейилади хабарда.
Изоҳ (0)