Ўзбекистонда 10—16 апрель кунлари илк бор «Ёш ватандошлар» фестивали бўлиб ўтади. Бу ҳақда Ёшлар иттифоқининг Facebook’даги саҳифасида маълум қилинди.
Тошкент, Самарқанд ва Бухоро шаҳарларида бўлиб ўтадиган мазкур фестиваль хорижда истиқомат қилаётган ёш ватандошларни Ўзбекистонда амалга оширилаётган ислоҳотларга жалб қилиш ва тажрибаларидан унумли фойдаланиш, инвестиция киритишга тарғиб қилиш, шунингдек, ёшлар ўртасида ўзаро мулоқот муҳитини яратиш мақсадида Ёшлар иттифоқи ташаббуси билан ташкил этилмоқда.
— Фестивалга АҚШ, Россия, Япония, Туркия, Покистон, Қирғизистон ва Тожикистон каби 20 га яқин давлатдан 70 нафар ўзбек ёшлари келади, жами 400 нафар ёш иштирок этади. Улар рўй бераётган ўзгаришларга гувоҳ бўлиб, ўзаро тажриба алмашиш имкониятини қўлга киритади, — дейди Ёшлар иттифоқи Марказий Кенгаши раиси ўринбосари Камолиддин Бекназаров.
«Ёш ватандошлар» фестивали тадбиркорлик, туризмни ривожлантириш, илм-фан ва ахборот технологиялари йўналишларида иш олиб боради. Мазкур йўналишларда давра суҳбатлари ўтказилиб, уларда чет элда муваффақиятли фаолият олиб бораётган, илмий салоҳияти юксак бўлган ёшлар тақдимот ўтказади, шунингдек, давлат вакиллари билан фикр-мулоҳазалар алмашади.
Тадбир доирасида «Муваффақиятли стратегия пойдевори», «Ўзбекистонда ёшлар тадбиркорлигини ривожлантириш», «Ўзбекистонда архитектура келажаги», «Ўзбекистонда барқарор ҳамкорлик учун асос«, «Ўзбекистонда инвестиция иқлими» ҳамда «Сайёҳларни туризмга жалб этиш йўллари «, «IT-лойиҳаларни бошқаришда энг муваффақиятли механизмлар», «Ўзбекистон Республикасининг иқтисодий ривожланиш истиқболлари» каби қатор мавзулар кенг муҳокама қилинади.
Изоҳ (0)