Фуқаролик ишлари бўйича судлар томонидан қандай ишлар кўрилади?

Адлия вазирлигининг «Ҳуқуқий ахборот» Telegram-каналида фуқаролик ишлари бўйича судларда қандай ишлар кўриб чиқилиши ҳақида маълумот берилди.

Фуқаролик ишлари бўйича судга қуйидаги ишлар тааллуқлидир:

• фуқаролик, оила, меҳнат, уй-жой, ер тўғрисидаги ва бошқа муносабатлардан юзага келадиган низолар бўйича ишлар, агар тарафлардан ҳеч бўлмаганда биттаси фуқаро бўлса, бундан қонунда шундай низоларни ҳал қилиш бошқа судларга ёки бошқа органларга топшириладиган ҳоллар мустасно;
• алоҳида тартибда юритиладиган ишлар (ФПК-293 модда), шу жумладан, юридик аҳамиятга эга бўлган фактларни аниқлаш, болани фарзандликка олиш ҳақидаги, фуқарони бедарак йўқолган деб топиш ва фуқарони вафот этган деб эълон қилиш тўғрисидаги, фуқарони муомала лаёқати чекланган ёки муомалага лаёқатсиз деб топиш ҳақидаги ва бошқалар;
• буйруқ тартибида ҳал этиладиган ишлар;
• Ҳакамлик судларининг ҳал қилув қарорлари юзасидан низолашиш тўғрисидаги ва ҳакамлик судларининг ҳал қилув қарорларини мажбурий ижро этиш учун ижро варақаси бериш ҳақидаги ишлар;
• чет давлат судларининг ҳамда чет давлат ҳакамлик судларининг (арбитражларининг) ҳал қилув қарорларини тан олиш ва ижрога қаратиш тўғрисидаги ишлар.