Воҳид Халилхожич Япония терма жамоаси бош мураббийи лавозимини тарк этди, деб ёзади «Sports.ru»
65 ёшли босниялик мураббий ЖЧ-2018 бошланишига 2 ой вақт қолганида ишдан бўшатилди. Мазкур мураббий японларни Россиядаги мундиалга олиб чиққанди. Япония март ойи сўнгида Мали (1:1) Украина (1:2) билан ўртоқлик учрашувларини ўтказганди. ЖЧ-2018 га чиқа олмаган терма жамоалар билан ўйинлардаги натижалар раҳбариятга ёқмаган кўринади. Япония футбол федерацияси раҳбари Козо Ташима бугун янги бош мураббий номи эълон қилинишини айтиб ўтди. Асосий номзод – Халилхожичнинг ёрдамчиси, Макото Тегурамори. У 2016 йилги Олимпиада ўйинларида Япония терма жамоасига устозлик қилган.
ЖЧ-2018 финал босқичида Япония Колумбия, Сенегал ва Польша билан бир гуруҳдан жой олган.
Маълумот учун Воҳид Халилхожич 2015 йил мартида Япония терма жамоасига бош мураббий этиб тайинланганди. Босниялик мураббий унгача эса Жазоир термасини бошқарган бўлиб, ушбу терма жамоа билан у ЖЧ-2014 да 1/8 финалгача бориб, амалдаги жаҳон чемпионлари Германия термасига мағлуб бўлганди.
Изоҳ (0)